八月一日新例生效，煙民無不叫苦連天，事關由呢一日開始旅客最多只准攜帶十九支免稅煙入境。
一包煙明明有二十支，點解只准十九支免稅煙咁零丁？呢家嘢當然又係特區政府嘅天才發明，吸煙危害健康吖嘛，以民為本嘅食衞局父母官唔鼓勵囉，唔鼓勵嘅辦法就係人為設限諸多留難，搞到你有幾煩得幾煩。
到底有幾煩呢？即使大家唔係煙民，不妨當笑話咁睇，幾鬼死過癮㗎。
呢嗱，當你喺免稅店買咗一包煙，即係有二十支啦，咁你就有必要為咗額外嘅一支煙去打稅。首先，你要搵個免稅店職員陪你去海關；然後，職員為客人搞一輪手續，得到一份准許證；跟住，職員連同准許證再帶客人去海關課稅室，再搞一輪手續；左搞搞右搞搞之後，麻煩你繳付每支煙一元二角稅款，另加二元牌照費；未走得住㗎老友，身份證吖唔該！
全套手續大概浪費青春二十至三十分鐘，嫌麻煩嘅煙民可能就會話嘞，拆開包煙先吸一支或者索性揼落垃圾桶咪得囉。呢個無疑係辦法，不過只適用於部分地點，假如你喺香港境內嘅免稅店買煙，由於你喺抵達海關課稅室之前係唔可以接觸到嗰包煙嘅，所以你仍然要做足全套打稅手續。
頭腦靈活嘅煙民又會話嘞，搵個非煙民，做個好朋友，兩人同行帶一包煙咪得囉。功夫茶提提你，呢個辦法行唔通，事關「十九政策」以個人為單位，而免稅店只會為一包煙提供一張單，所以係唔可以畀兩個人同時使用嘅。
麻煩哩？攞命哩？十九支煙搞到你一頭煙，以擾民作為出發點嘅父母官就會話嘞，乖乖地戒煙啦，你戒煙，我撐你！
功夫茶當然同樣唔鼓勵市民吸煙，不過有三個問題想請教特區政府。第一，咁搞法，係咪想趕絕正正當當做生意嘅免稅店？喂，法例冇話賣煙係犯法喎，「十九政策」肯定害到人哋拍烏蠅啦。第二，煙民最多怕麻煩唔買免稅煙啫，會唔會變相助長走私煙呀？擾民笨策萬一益咗私煙，捉蟲啫。第三，點解唔一了百了索性將吸煙等同吸毒？如果香煙即係毒品，賣煙又犯法，買煙又犯法，吸煙更犯法，香港咪可以百分百成為無煙都市囉！
計功夫茶話齋，目前嘅禁煙政策簡直不知所謂，室內係就係唔准吸煙，不過室外就煙霧瀰漫，街邊個個垃圾桶都有人「打邊爐」，路人甲乙丙一個二個被迫吸入二手煙。一邊准買煙，一邊禁吸煙，亦係荒謬到冇朋友，煙民周不時呻到樹葉都落，埋怨偽善政府淨係識得抽煙稅，抽稅禁煙形同過橋抽板，嚴重侵犯納稅煙民嘅應有人權。
嗱，功夫茶唔係要為煙民講嘢，而係要為全民發聲，一於咁啦，吸煙刑事化，香煙毒品化。當你將香煙等同毒品咯喎，一家便宜三家着：煙民唔使煩，一二三即戒；私煙冇運行，四五六冚旗；控煙不必辦，七八九收工。唯一損失只不過係庫房少一大筆煙稅收入之嘛，何樂而不為！