如果你係貓主狗主，相信你會好討厭漁護署。即使你唔係貓主狗主，只係冇乜變態心理嘅尋常百姓平凡人，相信你同樣不值漁護署所為。點解咁講呢？事關呢個全稱「漁農自然護理署」嘅政府部門最鍾意殺貓殺狗甚至其他動物，所以最近畀人起咗一個花名叫做「愚弄自然烏厘署」。
呢嗱，對上嗰個星期日之嘛，有五百位愛護動物人士頂住酷熱天氣烈日當空，走咗去上水狗房抗議，原因係漁護署捉狗隊手法太兇殘，捉狗變虐狗，嚇到你作嘔。有一段網上短片係咁嘅，漁護署走去天水圍捉狗，頸圈將兩隻唐狗勒到實一實，實到幾乎窒息嗰隻。旁觀途人驚呼狂叫，有人聲淚俱下哀求鬆開頸圈，有人義憤填膺喝令停止暴行，你估對方有乜反應吖嗱？捉狗隊變本加厲，居然愈勒愈實，勒到唐狗吐血，地上血漬斑斑！
虐狗事件惹起公憤，抗議當日示威者準備咗好多海報同標語進行血的控訴，除咗「愚弄自然烏厘署」之外，「狗官」啦，「可恥」啦，「殺手」啦，「收皮」啦，「血債血償」啦，總而言之群情洶湧反對濫殺。
如果你話虐待一、兩隻唐狗唔算過分罪孽深重啫，咁你就錯嘞，漁護署其實係長時間大屠殺嘅冷血兇手。流浪貓狗一旦落到漁護署手上，基本上就係死路一條，美其名「人道毀滅」，實際上就係殺殺殺殺殺！年中到底有幾多動物死喺漁護署手上？講出嚟真係痛心疾首，萬幾兩萬隻呀！
既然漁護署咁令人討厭，所以咯喎，署長黃志光尋日出席元朗區議會會議，場內有區議員炮轟，場外有示威者聲討，內外夾擊一面倒批評署方手法不當。其中有區議員話，箍頸會造成傷害，建議重新檢討捉狗方法，例如使用網槍，並且以絕育而唔係屠殺控制狗隻數量。
計功夫茶話齋，都二十一世紀啦，「愚烏署」冇理由仲要用咁原始野蠻嘅方法捉狗嘅。作為文明人類，更加唔應該捉一隻殺一隻，所以愛護動物人士提出嘅「捕捉、絕育及放生」政策絕對值得考慮。
吖，幾乎講漏咗「愚烏署」另一個令人髮指嘅荒謬行為。大家都知，部分珍貴動物係受到法例保護嘅，譬如話五爪金龍巨型蜥蜴。早幾個月，水警偵破走私案，檢獲一百八十隻五爪金龍巨型蜥蜴，轉交署方處理啦，「愚烏署」居然唔理三七二十一全部殺清光，理由係「健康情況欠佳」。喂，話到明法例保護，有乜理由殺到片甲不留呀？即使健康情況欠佳，係咪應該醫番好佢呀？醫生肯定唔會同病人講，嗱，你健康情況欠佳，所以一槍打瓜你！
唉，講到尾，漁護署睇怕都要徹底重組先至有得救，原來虐畜文化係由署長帶頭。黃志光話喎：「正如警察捉賊，賊都會反抗；隻狗反抗受咗傷，唔係旁人話放就放，畀隻狗隨街走，咬親人或者有瘋狗症蔓延邊個負責？」
署長言論冷血成咁，早抖啦！功夫茶贊成先換署長，再將「愚烏署」重新改造成善待動物嘅正常漁護署！