私隱線！呢鋪真係私隱線大災難！
八達通早前被踢爆出賣客戶個人資料，本來扭扭擰擰打死唔認，點不知個人資料私隱專員吳斌展開聆訊之後，八達通前日終於「今日之我打倒昨日之我」，招供承認利用市民私隱牟利。換言之，八達通從第一日開始就大話連篇！
按照八達通行政總裁陳碧鏵嘅講法，曾經提供接近二百萬名用戶嘅個人資料畀六間商戶，單單過去四年半就換取四千四百萬元收益。你知啦，私隱線被侵犯就好似剝光豬，二百萬人集體剝光豬，你都咪話唔恐怖。
咦咦咦，咪住先，醜聞愈揭愈臭。尋日喎，陳碧鏵出席立法會解畫，議員狂插八達通為賺錢走火入魔之餘，更加揭發受害人數不止二百萬，原來係四百萬！七百萬人口嘅香港有一半以上剝光豬，呢個簡直係光豬之都！
點解要出賣私隱呢？講來講去當然係見錢開眼，假如買家透過客戶資料例如打電話成功推銷自己嘅產品，八達通可以收回佣，呢家嘢先至係名副其實嘅「日日賞」。
既然八達通見利忘義，係咪反映出賣私隱其實係業界行規？呢嗱嗱嗱，私隱專員吳斌又爆料，佢話有兩間銀行承認外轉客戶資料，已經裁定違法。計功夫茶話齋，成件事肯定只係冰山一角，話唔定全港七百萬市民已經被賣到一乾二淨，如果唔係你點會成日收到來歷不明又煩不勝煩嘅推銷電話吖！
話時話，八達通嘅最大股東係港鐵公司，而港鐵公司嘅最大股東係特區政府，照咁講，間接造成私隱線大災難嘅咪就係小市民嘅父母官？父母官賣小市民豬仔，咁又算唔算係「賣港求榮」呢請問？
講到呢度，功夫茶有必要飲啖茶抖一抖氣，事關隔籬街有另一件事發生，睇下係乜先——
原來係咁嘅，吳斌再過幾日即將退休，接任人選係郵政署前署長蔣任宏，郵政局員工會以及人權組織大大聲嗌反對。反對嘅理由係蔣任宏其身不正，擔任郵政署署長期間曾經利用針孔鏡頭監視員工，亦即係侵犯私隱。郵政局員工會再踢爆另一惡行，蔣任宏曾經將數以百計市民求職資料洩露畀外判公司，同樣又係侵犯私隱。仲有一個問題值得擔心，蔣任宏係公務員出身，監察政府可能會出現「官官相衞」。
嘩！呢鑊眼冤嘞，八達通醜聞肯定手尾長有排跟進，之但係過幾日就改由蔣任宏揸莊。蔣專員一來有偷窺前科，二來有利益關係，話唔定放軟手腳唔會追殺八達通最大股東嘅最大股東，亦即係放生特區政府。如果係咁，慘遭集體剝光豬嘅小市民咪冇仇報？
計功夫茶話齋，八達通除惡未盡，私隱線災難未了。只要蔣任宏一如所料辦事不力甚至隻眼開隻眼閉，縱容官僚透過港鐵再透過八達通出賣私隱，香港永無寧日都得咯！