唔經唔覺，農曆七月，功夫茶溫馨祝福大家出入平安。
搞邊科呀？大家可能會問。農曆七月咁又點呀？大家可能再問。嗯，係咁嘅，相傳農曆七月一日係鬼門關開放時間，一直到七月三十日先至落閘閉關，期間游魂野鬼會周圍搵嘢食，而成個「鬼月」嘅高潮所在當然就係七月十四盂蘭節。所以咯喎，功夫茶唔會祝大家盂蘭節快樂，只係會祝大家出入平安，另加百無禁忌。
年年盂蘭，今又盂蘭，本來冇乜咁稀奇。之不過咁，今年盂蘭節顯得比較特別，事關特區政府唔知係忽然熱心定係忽然黐筋，竟然將香港嘅盂蘭勝會申請列入國家級非物質文化遺產。
嗱，先旨聲明，功夫茶舉腳贊成保育文化遺產，話特區政府忽然黐筋純粹係由於往績實在太差嘞，差到冇朋友嗰隻。萬一成功申遺，而盂蘭節到頭來又得唔到應有保護之餘更加瀕臨絕迹，你話係幾咁荒謬絕倫兼夾失禮街坊！
遠嘅唔講吖，最近已經有兩單保育失敗例子。第一單，有富豪想將香港後花園西貢大浪西灣私有化，大興土木破壞自然生態，政府居然傻更更後知後覺，如果唔係傳媒揭發配合網民怒吼，傻官甚至唔知事發現場原來一早被列作考古遺址。
第二單，今年七月一場黑雨搞到大埔碗窰村毀人亡，更加將大量珍貴文物沖落山腳底，原來當地係擁有幾百年歷史嘅製窰工場，被認定係中國境內唯一保存完整嘅窰場，早於一九八三年被列作法定古蹟。可惜吖，差不多三十年以來毫無管理可言，古物古蹟辦事處保護不力，卒之淪為滿目瘡痍，任由雨水沖走古董。
講番俗語所講嘅鬼節吖，研究盂蘭節活動多年嘅導賞導師張熙明擔心，即使最終被列作國家級非物質文化遺產，亦可能因為政府推廣不力，以及社區欠缺包容而岌岌可危。張熙明又話，盂蘭勝會限於財力同場地，活動規模不斷縮小，甚至有人將傳統唱大戲改唱流行曲，做足全套盂蘭勝會儀式嘅團體已經寥寥可數。
話時話，有一樣嘢確係相當諷刺，中國人嘅鬼節就死氣沉沉，西方人嘅鬼節就生氣勃勃，年年萬聖節熱熱鬧鬧玩到癲。如果有人可以將盂蘭節包裝到一如萬聖節咁鬼死好玩，咁咪唔使勞煩傻更更官老爺諗爆頭都唔知可以點保育囉。
咦，幾乎唔記得，其實特區政府都幾大想頭㗎，未必係生氣勃勃，起碼係雄心勃勃。冇耐前之嘛，政府已經話要向國家文化部申請，將長洲太平清醮以及大坑舞火龍列入國家級非物質文化遺產。
吖，點講好呢，政府保育工作甩頭甩骨，無端端又鬼話連篇咁積極申遺，唔通係撞鬼？
總而言之，保育鬼節搵鬼信，遺產撞鬼變遺憾，功夫茶無任歡迎港產官僚以行動證明呢個講法係錯嘅！