最近有一套講發夢嘅電影大熱，十個睇過十個話正，搞到功夫茶都發夢，夢到咁嘅荒誕情節——
旺角行人專用區熙來攘往遊人如鯽，男女老幼行街街享受購物樂趣，售貨員擘大喉嚨起勢拉客：「埋嚟睇，埋嚟揀，唔買都玩玩！」失驚無神，大禍臨頭，一列火車衝入行人專用區，撞到成街死傷枕藉！
咦咦咦，咪住先，呢個怪夢係咪電影橋段？冇錯，確係電影橋段，之不過咁，假如你將火車改成汽車，相信會令你覺得唔算過分超現實，事關運輸署做咗一個危險動作，隨時真係會害到旺角行人專用區大禍臨頭。
呢嗱，叫得做行人專用區，當然係禁止車輛駛入㗎啦，畀市民無後顧之憂安心行街街吖嘛。原本禁止車輛駛入嘅時間係咁嘅，星期一至星期六由下午四時至晚上十二時，星期日及公眾假期由正午十二時至晚上十二時。哈，運輸署話喎，即日開始試驗縮短旺角三段行人專用區嘅實施時間，提早一粒鐘於晚上十一時結束。
咁咪就係大整蠱囉，街坊街里多年以來已經習慣行人專用區嘅時間安排，個個以為十二點先至會有車輛駛入，家陣運輸署忽然之間話變就變，完全冇宣傳，人人不知情，提前一粒鐘放車上路，你話嘞，怪夢情節係咪會發生吖？危險動作係咪隨時累及無辜吖？
其實呢，縮短行人專用區實施時間唔係話唔得，提早一粒鐘於晚上十一時結束未嘗不可，問題係，冇理由唔聲唔聲嚇你一驚吖嘛，起碼應該整個預告單一聲。運輸署混帳嘅就係，呢頭宣布，嗰頭實施，徹徹底底殺你一個措手不及，莫講話行人冇心理準備，各大商舖亦大受影響。你知啦，香港人做生意好搏殺㗎，晚上十一點之後仍然有好多人未收舖，忽然之間行人專用區變咗人車爭路區，售貨員拉客都未變得切招啦。
因乜事幹要縮短行人專用區時間呢？呢個其實係地區人士關注嘅問題，畢竟大批遊人聚集街上係會有噪音滋擾嘅，而且光污染相當嚴重，街坊未必有覺好瞓，所以油尖旺區議會建議，縮短行人專用區時間一粒鐘，於是乎就有呢個試驗計劃嘞。
計功夫茶話齋，冇人唔畀你縮短時間，更加冇人反對你改善街坊生活質素，之但係凡事都應該按部就班吖嘛，冇可能未曾拍拖即日結婚。新嘅時間安排喺八月二日實施，運輸署點解唔提前若干時間昭告天下？正常地球人約朋友食飯都會提前幾日甚至幾星期啦，只有外太空怪獸先至會未經預約登陸地球嘅啫！
忽然放車闖人群，怪獸官僚太胡混，既然運輸署冇事先張揚，咁就由功夫茶越俎代庖。旺角街坊請注意，旺角街坊請注意，行人專用區十一點之後車來車往，麻煩各位打醒十二分精神，祝大家出入平安！