大家都知中國足球水準有幾低o架啦，所以有恨鐵不成鋼嘅球迷贈咗佢哋一副對聯：國足能有幾多愁，恰似太監上青樓。橫批：無人能射。
計功夫茶話齋，只要改一改兩粒字，即刻可以借花敬佛：消防能有幾多愁，恰似太監上青樓，無人能射。
消防何解要發愁？原來喎，消防處斥資七千幾萬銀購入十七架法國製油壓升降台消防車，先後被揭發射水無力以及爆喉問題，首批九架抵港已經一年嘞，問題始終未解決。好衰唔衰，餘下八架新車上月亦抵港，不過一樣有問題。由於要顧及安全，所以消防處決定停用全部十七架消防車，以待獨立工程顧問公司徹底檢查，一旦發現係廠方設計失誤，會考慮向承造商追究。
大佬，消防車用嚟救命o架，無人能射非常大鑊，萬一唔知邊個唔好彩身陷火海，風馳電掣趕赴現場嘅消防車竟然「軟水救不了近火」，死都死得零舍冤枉啫！
既然消防處基於安全理由停用新簇簇嘅消防車，即係得物無所用，消防員等於蜑家雞見水唔飲得，功夫茶都要基於安全理由向大家發出一個溫馨提示：千祈唔好玩火，千祈唔好失火，中秋佳節唔好煲蠟，火燭本來已經危險，恰似太監上青樓嘅消防員冇辦法「射住射住」更加牙煙。
大拿拿七千萬公帑，因乜解究會買十七架形同廢鐵嘅法蘭西消防車？法國製造唔通係假嘅，實情係中國製造山寨版？按照常理推測，入貨之前當然要驗車o架啦，買部七千銀手提電話都要驗屍咁驗，何況家陣講緊七千萬。所以咯喎，如無意外就係負責驗貨嘅仁兄仁姐太低能，甚至乎驗都唔驗就瞌埋眼交易。你知啦，驗車地點係詩情畫意浪漫到暈嘅法蘭西，不排除有人名為驗車、實為遊埠，結果就傻頭傻腦入錯貨。
講到入錯貨咯喎，消防處都唔係第一次o架喇。○三年斥資五百六十萬元從芬蘭購入可升高至十六層樓高嘅梯枱車，點知竟然由於車身過分龐大，難以在一般道路行駛，長時間停泊於東涌消防局。○四年斥資七億元引入第三代調派系統，衞星定位系統居然又將路上行駛嘅救護車顯示為「在水中央」，好似「海上行舟」咁過癮。
講番今次入錯貨，十七架新車原本用作替換行駛多年嘅高齡升降台，家陣無車可換，令部分舊車過咗維修時限仍然要每日服役，難怪前線消防人員擔心舊車死火，影響救援工作。
唉，救護車經常死火已經唔係新聞，一旦連消防車都跪低，真係唔知點算好。中國足球無人能射頂多笑到無地自容啫，香港消防無人能射隨時搞出人命o架！
中國足球射波無力，照例係要換領隊嘅，香港消防射水無力，咁又點呢？功夫茶奉勸消防處處長好自為之，小心自己火燒後欄！