提起本港大學嘅迎新活動，好多人就皺晒眉頭，所謂迎新，來來去去都係嗰幾招，唔係玩淫賤，就係玩不文，年年如是，毫無創意。唉，悶唔悶啲吖！
呢，今年又嚟啦，多次被踢爆玩不文迎新嘅中文大學，又係例牌菜。雖然新任校長沈祖堯預先忠告學生，要玩得有品味，唔好罔顧人哋嘅尊嚴同意願，可惜，校長有校長忠告，學生有學生繼續不文。點樣不文？幾十個搞手喺校內體育館大晒冷，對住相機齊齊豎起中指，夠不文喇啩。仲有吖，佢哋驚死冇人知，事後仲將相片放上網添，問你服未！
講起中大迎新，有一年玩得仲激，居然玩四院互片，各學院嘅新生鬥用不文語言同手勢互相攻擊，搞到校園烏煙瘴氣。事後經傳媒圖文並茂報道，中大迎新營從此臭名遠揚。更不堪嘅係，《中大學生報》居然教學生點樣開房，引起一場大風波。
其實，呢啲只係小兒科咋，今時今日，好多大學生可能已經唔知「廉恥」兩個字點寫。嗱，早兩年有大學搞反屈蛇行動，反嘅唔係偷渡客，而係本校學生，男生屈蛇去女生宿舍過夜，又或者帶女仔返宿舍爆房，早已係家常便飯。有啲仲玩混合雙打，一間房兩張床，各自梳乎，簡直令人嘆為觀止。
教育界人士驚呼，新一代品格差劣問題令人擔心。查實，新一代品格差劣已經唔係乜嘢新聞，唔值得大驚小怪。有團體早前做咗一項調查，訪問咗幾百個小學教師，三成一受訪者認為青少年對品格認識貧乏，八成五仲認為現時青少年品格唔合格。
話時話，出現咁嘅情形，家長有責任，學校有責任，教育當局更加有責任。中國人一向提倡五育，即係德、智、體、群、美樣樣都要齊，可惜本港教育完全睇唔到呢五育。
有家長團體投訴，學校只重視學生分數，一切都係為咗應付考試，根本就冇德育呢樣嘢。卒之搞到世風日下，小小年紀就乜都做齊，有人吸毒，有人索Ｋ，有人偷嘢，有人搶劫，有人加入黑社會。唉，正如孔老夫子話齋：吾不欲觀之矣！
歸根究柢，當局實在難辭其咎。各界一早就呼籲當局調撥資源加強德育，但係當局口爽荷包立，講多過做，咁搞法，學校有乜法子唔亂晒大龍？
國學大師梁啟超講過，少年智則國智，少年強則國強，少年進步則國進步。對照今日香港嘅情形，就令人傷心嘞，香港嘅青少年只識玩不文，玩淫賤，既不智，亦不強，又不進步，香港明天又點會更好呀！