政情：爭辯最低工資 譚耀宗壓陣

立法會研究最低工資附屬法例嘅小組會今日開鑼，直至尋日為止，共有二十一名議員加入，以勞工界同基層議員最疊馬，工聯會、勞聯、職工盟同街工等共九人，工商界有五人，好似總商會代表林健鋒、工業總會代表梁君彥同飲食界代表張宇人咁，壁壘分明。勞工界姿態上企硬爭取三十三蚊，商界就堅持廿八蚊都太高，破壞營商環境，兩邊陣營為向選民交代，駁火嘅激烈程度，預計不亞於之前審議最低工資嘅條例草案委員會。

角色較中立 勞商皆接受

首個最低工資水平定喺二十八蚊，備受爭議，港府嚴陣以待，小組委員會係水平出台後首個議會戰場，今日第一個議程，就係選主席，呢一步棋，港府同樣不容有失。據悉，港府官員近日向建制派埋手，游說由有工聯會背景嘅民建聯主席「譚Sir」譚耀宗出任主席，指主席呢個位置比較敏感，手握決定議程優先次序同控制會議進程嘅權力，若由勞工界坐，商界一定反枱唔制，如果由商界嚟做，勞工界又唔放心。搵角色較中立嘅譚Sir做主席，咁就雙方都可接受啦。

記得去年審議最低工資草案委員會成立時，勞工界同商界爭奪議會主導權，主席職位分外敏感，當時政府又係抬譚Sir上轎，即使譚Sir已身兼政制事務委員會同議事規則委員會兩個重要委員會主席，都要佢上陣做埋最低工資草案委員會主席。依家草案委員會收檔，又要做最低工資小組會主席，睇嚟政府真係當正譚Sir係麻煩問題「清道夫」，專做議會和事老。

職工盟李卓人對譚Sir做最低工資小組會主席無大意見，話相信勞工界同商界議員都唔會諗住拖慢首個最低工資水平出台，邊個做主席問題不大，反而兩邊陣營都希望喺小組會內爭相發聲，做主席少咗發表立場嘅機會，所以即使政府搵佢做主席，佢都要諗過先咁話。