政情：米老鼠簽名會坐冷板
一連七日嘅書展尋日開幕，唔少有出書嘅名人都會喺書展搞簽名會，同書迷見面。去年尾出書爆維港巨星匯「內幕」嘅投資推廣署前署長盧維思（米老鼠）都唔執輸，尋日午飯時間搞咗一小時簽名會，點知成個鐘都冇人搵佢簽名。難得坐冷板櫈嘅米老鼠依然笑面迎人，話自己EQ好高，唔會為小事唔開心，好阿Q！
米老鼠解釋自己太遲確認出席簽名會，趕唔切通知書迷同朋友，先搞到場面咁冷清。不過喺米老鼠隔籬搞簽名會嘅孔教學院院長湯恩佳就好受歡迎，大批八十後青年打蛇餅搵佢攞簽名，唔知情嘅仲以為佢哋等緊G模添！難為米老鼠仲識得自嘲：「I'm too old to be jealous！」即係話自己唔會妒忌啦，因為年紀太大。不過如果要佢學G模咁吸客，佢就講笑話最多只係除咗件面衫，應該都係冇乜吸引力，好抵死！
貿發局總裁林天福中午冇現身米老鼠嘅簽名會，下午反而去咗睇「名人講故事」嘅環節。尋日同小朋友講故事嘅係著名小提琴家、前港澳辦主任魯平嘅新抱姚珏，佢講咗個同樂器有關嘅小故事，在場小朋友仲爭住同佢合照添！
