英傳媒唔順再爆世盃黑幕

英國《太陽報》及《星報》同時引述消息人士爆料，指俄羅斯申辦團行政總裁蘇洛堅喺星期三已拍心口，告知英格蘭申辦團，俄國已攞到足夠票數，明顯同國際足協委員傾掂數。英國傳媒都明嘲暗諷俄羅斯用錢買主辦權，又搬出維基解碼，指俄羅斯係「黑手黨國家」，貪污問題嚴重，國內每年貪污金額高達二千億鎊。

卡梅倫失望拒賀普京

報道又引述俄羅斯足球名宿畢保洛夫，指該國有百分之20至40足球賽事涉及打假波，認真烏煙瘴氣。英國《太陽報》又話俄政府最擅長利用犯罪組織，以非法手段達到目的，《鏡報》則批評國際足協只向錢看，更暗諷俄羅斯收買國際足協委員。

擁有星級陣容嘅英格蘭申辦團喺主辦權揭曉後，表現一片哀愁，首相卡梅倫氣憤難平，直言無意打電話恭賀普京，其發言人稱英國繼受大風雪吹襲後，再遇沉重打擊。威廉王子深感失望：「我哋提出嘅申辦條件非常優厚，團隊工作亦很出色，但最終功虧一簣，實在令人失望，但無論如何，我為申辦團所做嘅一切感到驕傲，同時恭賀俄羅斯取得主辦權。」至於碧咸喺陳述申辦內容時，搬埋已故祖父上枱，向大會動之以情，但都無功而還：「我哋陳述堪稱完美，唯獨未能取得主辦權。」

俄羅斯力撐結果公正

另一邊廂，俄羅斯首度取得世界盃主辦權，國內一片喜氣洋洋，俄羅斯國內亦有大量人民冒住零下20度寒冷天氣上街慶祝。總統梅德韋傑夫喺微博大呼勝利，總理普京立即飛赴瑞士，以勝利者姿態講述主辦大計：「我希望世界盃可改善國家形象，國際足協投票係公正嘅，選擇俄羅斯符合國際足協推廣足球向全世界嘅理念。」

另英國博彩公司威廉希爾開出俄羅斯奪得2018年世界盃冠軍賠率為21倍。

本報綜合報道