政府計劃徵用清水灣郊野公園五公頃土地來擴建將軍澳垃圾堆填區，據環境局邱騰華的解釋，指堆填區唔擴建，三至四年就填滿；若獲立法會支持，堆填區壽命可延至二○二○年。依此邏輯，是否二○二○年填滿，又再徵多五公頃玩吓，直到成個清水灣郊野公園變成垃圾堆填區？煮鶴焚琴有過此者乎？
邱騰華搞環保，記憶中冇瓣掂。徵膠袋稅、停車熄匙、慳電膽……冇一瓣得民心，擾民多於一切。唔夠班，又唔肯執二攤，搞環保一味斷估。呢個世界，如果有人為咗煮熟個蛋而把屋企的酸枝古董家具當柴燒嘅，恐怕只有邱騰華一個人。咁嘅屎橋只可以將香港變臭港，距環保理念十萬八千里！
邱局長「小小五公頃」引來千重浪，唔單止飽受堆填區滋擾嘅將軍澳居民群情洶湧，環保團體、立法會議員亦無不義憤填膺，誓要為自然生態環境疑似被姦污，打一場「貞操捍衞戰」（《太陽報》林創成語）。
科學日新月異，搞環保要與時並進，尋求先進嘅垃圾處理科技。昔日焚化爐落後會排出有毒物質，如今西歐多國已建設不排毒氣的焚化爐，且在外觀和環保方面都有很大改善。
邱局長原先聲大夾惡，又搬出律政司「釋法」，又話連特首亦無權「收回成命」，阿哥，咁即係話你隻手可遮住藍天，搞環保難道要靠惡？喂！家陣你似惡爺土豪多過似環境局局長噃。
眼見勢頭不對，局長大人以為退一步海闊天空，只把擴建堆填區生效日期延遲，扮完惡爺接着又扮鴕鳥，辛苦晒！