政情：鄭海泉：我好番晒喇
早前身體抱恙要請假兩個月接受治療嘅滙控執行董事鄭海泉（Vincent），近日重出江湖，繼前日以滙控及中大校董會主席雙重身份出席中大活動之後，尋日下午我哋又撞到佢同太太鄭曹志安去中環一間酒店食飯撐枱腳，於是第一時間上前問候佢。Vincent報以一貫招牌式笑容，同大家報喜：「啱喇！你幫我同全世界講，我無事，已經好番晒喇！」
病愈後嘅Vincent看來精神唔錯，只係清減咗好多，臉容亦無以前咁飽滿，佢話目前正處於調理身體階段，而且個人特別容易疲倦，但整體情況好理想，叫大家唔使為佢擔心。問佢鄭太煲嘅愛心湯水係咪對病情有好大幫助，Vincent同太太都笑而不答。不過，Vincent始終無透露自己患上咩病。
早喺今年五月中，滙豐內部突然傳出Vincent請假兩個月，身為滙豐中國董事長嘅佢，連六月初喺上海嘅滙豐新中國總部開幕儀式都缺席，難怪佢患病之說甚囂塵上。Vincent重出江湖，尋日不忘透過我哋向關心佢嘅朋友傳話：「我返咗成個月工喇，只係無人知之嘛！」