潮流興講「地產霸權」，冇辦法，今時今日最賺錢嘅行業就係地產，即使你唔係地產商只係小業主，將單位放租一樣豬籠入水。好多做生意嘅商家不時抱怨，賺埋賺埋唔夠交租，假如遇上無良業主，一見你生意火紅商機無限，馬上瘋狂加租同你分身家，你都咪話唔狼死。
好似旺角有一間老字號書局咁吖，賣書賣咗四十年，最近宣布搬遷，然後將舖位出租，有人出價月租九十五萬元。書局老闆好感慨咁話，九十五萬等於每月賣九萬五千本書，點賣呀！
話就話地產霸權，之不過世事無絕對，大家有冇諗過香港有一個大業主，居然任由名下物業養曱甴老鼠懶得收租？唔好以為功夫茶作古仔呀，真係有一個咁戇居嘅大業主㗎，簡直就係嫌錢腥嘅敗家仔行為。大家估下空置物業嘅總面積有幾大吖嗱？答案係，超過七萬平方呎，咁多年嚟眼白白損失二千幾萬元租金！
唔使多講啦，有本事坐擁超過七萬平方呎而懶得收租嘅，當然係全港最大業主特區政府。食環署轄下油尖旺有三大街市，由於種種理由而執笠大吉。正常而言，你唔做街市啫，可以改變用途租畀人吖，印印腳收租都不知幾和味。好衰唔衰食環署係出晒名嘅懶骨頭，十足十荒廢家業嘅二世祖。
好似鄰近尖沙咀「韓國街」，位於酒店之下嘅「前金巴利街街市」咁吖，兩層樓面總面積超過四萬平方呎，去年四月因為公眾使用率低而關閉。丟空至今二十個月，一直重門深鎖，政府仍然未公布發展方向。
情況比較好少少嘅係鄰近旺角朗豪坊嘅「前豉油街臨時熟食市場」，佔地約六千平方呎，由於妓女聚集以及衞生問題而於○六年十二月一日關閉。所謂情況比較好少少嘅意思係話，呢個街市冇錯係丟空，總算喺○九年九月以短期租約租出作為臨時收費公眾停車場。之不過咁，未來發展計劃一樣係冇㗎，短期租約過咗之後都唔知點算。
至於「前旺角街市」咯喎，總面積接近二萬七千平方呎，丟空九個月嘞，即使區議會多番討論，食環署照樣闊佬懶理。現址遍布垃圾，膠箱塞滿閘口，功夫茶相信已經變成爬蟲樂園。
你知啦，油尖旺係香港最值租嘅黃金地段之一，如果唔係，嗰間老字號書局舖位都冇可能月租九十五萬啦。有地產代理計過數，假如食環署將三大街市出租，當你每呎月租二十元計算，咁多年至少收租二千四百萬！
喂，二千幾萬呀大老爺，用嚟扶貧都好吖，點解要無端端浪費呢？蝕租固然係問題，浪費土地同樣係問題，假如官老爺真係嫌錢腥，咁咪免費開放畀街坊街里做康樂活動囉，點都好過任得佢結晒蜘蛛網吖嘛。
所以話啫，地產霸權唔可以一概而論，當你見識過食環署嘅敗家行為，你會發覺大業主有時候係有錢都懶得執㗎！