放走卡特 增添3猛將 魔術大換血攻力暴升

魔術目前成績為十六勝十負，喺東岸排第四，要稱霸東岸可謂困難重重，故會長奧堤斯史密斯決定率先出招：「球隊季初表現未如理想，需要一啲改變同新衝擊。」

喺呢宗交易之中，魔術先以「加拿大飛人」卡特、大後備比杜斯、中鋒哥達同一個明年新人名額交易到太陽，再加上三百萬美元，換來陶告魯、積遜李察遜同艾爾奇勒。另外再以李維士向巫師換來亞連拿斯。

表面睇，魔術呢宗交易可以話有賺，因為陶告魯係「魔獸」杜域侯活嘅最佳拍檔，去年魔術就憑兩人之力打入總決賽。另外，積遜李察遜同亞連拿斯都係所屬球隊嘅首席射手，今季平均得分達19.3及17.3分。

麻煩友亞連拿斯最興奮

亞連拿斯對呢宗交易感到雀躍：「我已經冇打季後賽好耐，難得依家可加盟一支有力爭標嘅球隊，同一班咁好嘅隊友合作，令我感到興奮！」

不過，籃球從來唔係一加一等於二嘅運動，魔術新組合能否擦出火花，產生化學作用仲係未知之數，尤其係亞連拿斯出名係麻煩友，過往曾因帶槍入更衣室而被罰停賽，加盟魔術後，呢位大佬能否習慣寄人籬下嘅生活，成為魔術能否取得好成績嘅關鍵。