中環出更：鐵頭仁赴諾獎趕製中山裝
民主黨主席何俊仁為出席聽日喺挪威舉行嘅諾貝爾和平獎頒獎典禮，陰錯陽差去咗觀奇洋服旺角分店度身訂造中山裝。由於時間緊迫，觀奇幫佢喺三日內急急起貨。前日卓妮撞正鐵頭仁去攞衫，見佢成個人即時增添三分英氣，咁趕都抵啦！
咩事搞到咁趕呢？原來鐵頭仁要去挪威見證沒有得獎人出席嘅諾貝爾和平獎頒獎典禮，喺大會規定嘅踢死兔同民族服裝之間，選擇着中山裝，始終係中國人嘛。而且擁有中山裝一直係佢嘅願望，今次終於可以的起心肝買番件。
上周五，鐵頭仁經朋友介紹，去咗旺角搵間平靚正嘅店舖，諗住去執番件，點知去到先知間舖執咗笠。鐵頭仁惟有就近行過上海街間觀奇洋服，拿拿臨落急單訂做。好彩觀奇做慣電視台戲服生意，三日起到貨，鐵頭仁先至冇出洋相。
貪靚揀企領
卓妮見佢套中山裝嘅設計，基本上保留咗傳統原汁原味嘅四個袋特色，唯一係捨棄反領要番企領，佢話反領好難着囉，諗唔到鐵頭仁都係貪靚一族。