賽艇情侶榮華組合全力衝牌
港隊在近屆亞運賽艇項目都有獎牌落袋，例如前屆羅曉鋒及上屆李嘉文奪得銀牌，今屆廣州亞運，香港賽艇隊將派出八男五女共十三人大軍出征，教練白勵表示，起碼要入決賽，其中「賽艇情侶」羅曉鋒、李嘉文，以及男子雙人鄒廣榮與蘇秀華嘅「榮華組合」，都有衝牌機會。
羅曉鋒將參加男子單人公開組賽，他在02年亞運奪銀，上屆失落獎牌，坦言今屆將以輕鬆心情應戰，並指自己擅鬥長途，今屆賽事對自己有利：「上屆失利主要原因係多哈只能安排一千米賽道，當時亦係自己運動員生涯最低潮，先會失落獎牌，今屆廣州亞運賽程回復鬥二千米，我擅鬥長途，就算起步唔好都有得追！」
體院運科團隊支援港隊
羅曉鋒女友李嘉文上屆為港隊奪得銀牌，今屆目標是保住獎牌，並會請教男友，她說：「阿鋒有上屆失落獎牌經驗，令我有所體會，其實每次比賽都唔應該睇以前，四年來我在技術及力量上均有提升，定會全力爭取獎牌。」
李嘉文話唔理以前戰績，男子雙人艇鄒廣榮與蘇秀華卻有相反睇法，「榮華組合」指他們去年在東亞運奪金一刻嘅情況，將成為兩人今屆亞運爭取佳績嘅動力：「東亞運賽事末段勝出畫面，依家仲記得好清楚，所以訓練幾辛苦我哋都會撐埋佢。」
此外，體院運動科學部團隊昨介紹支援港隊運動員備戰亞運情況，當中包括動用高科技例如多用途跑步機、低氧房、多功能生理監察系統、運動技術和戰術錄像分析系統、高速3D動作分析系統，並配合中醫中藥及營養與生化，協助港隊爭取佳績。
香港賽艇亞運隊名單及參賽項目
男子公開組單人艇：羅曉鋒
男子輕量級單人艇：駱坤海
男子輕量級雙人艇：鄒廣榮／蘇秀華
男子輕量級四人艇：關騏昌、梁俊碩、廖順賢、鄧超萌
女子輕量級單人艇：李嘉文
女子輕量級四人艇：陳紫慧、張麗賢、李婉賢、湯少文