政情：周松崗陪彭博搭港鐵

彭博尋日出席完會議之後，特登走去試搭港鐵嘅列車，港鐵當然不敢怠慢，由行政總裁周松崗同副車務總監金澤培親自招呼。一行人喺灣仔上車，一直搭到去中環，之後慢慢行過去香港站，再搭一程車去到青衣。

彭博自己係美國大型資訊平台「彭博社」嘅創辦人，做咗紐約市長後，依家仲係「彭博社」嘅大股東，尋日佢喺香港站咁啱又見到大電視播放緊「彭博社」嘅節目，笑到見牙唔見眼之餘，仲即場影番張相留念添！彭博喺青衣參觀咗港鐵嘅車務控制中心，事後盛讚港鐵運作效率高，車廂仲好清潔。咁又係，比起紐約嘅地鐵，彭博感受應該更深！