咦？乜唔係口噏噏當秘笈咋咩？原來係認真㗎？特區政府公布喎，成立二○二三年亞運會臨時申辦委員會，主席係民政事務局局長曾德成，副主席係港協暨奧委會會長霍震霆。
嘩！勁揪呀！犀利呀！香港將會有幸榮膺亞運東道主，呢鋪簡直光耀門楣，祖宗十八代與有榮焉！
之不過咁，又唔好咁快開心住，事關十畫都未有一撇，你想食嗰隻豬仲未出世。政府話喎，當局決定應否支持申辦亞運之前，會進行廣泛嘅公眾諮詢，收集社會意見。最終決定視乎公眾諮詢嘅結果，以及立法會財務委員會是否接納可能涉及嘅財務承擔。
明白未？家陣只係擺出一個非常初步嘅姿勢，乜乜東東都未有㗎，連是否決定申辦亞運都係未知之數；假如最終決定申辦嘞，成功定係失敗更加無法逆料；萬一唔知點解大話夾好彩成功申辦，是否辦得成一屆令人滿意嘅亞運同樣係一個大大嘅問號。
咪住先，大家如果唔善忘，應該記得香港曾經試過申辦亞運，數數手指……嘩！十年前咯，時間過得真係快過火箭。二○○○年香港申辦○六年亞運，功夫茶仲記得口號係「香港一定得」，結果事與願違變咗「香港得個吉」，輸畀卡塔爾嘅多哈。
當年香港申辦亞運失敗表面上相當瘀皮，實際上唔少人額手稱慶，暗地裏拍掌歡呼，點解呢？無他嘅，主辦亞運始終係一項勞民傷財嘅虛榮工程，未見其利往往先見其弊，唔辦好過辦咯。正所謂，塞翁失馬，焉知非福。
遠嘅唔講吖，大家睇睇今年即將舉辦嘅廣州亞運，都唔知導致過幾多次官民衝突咯，主要問題涉及收地重建。你知啦，內地執法部門好惡死㗎，一話要收番你笪地興建唔知乜嘢體育館，砰砰嘭嘭就將你嘅美好家園夷為平地，賠償又未必賠到足，怒民唔火遮眼就難啦。卒之，呢度嘈到拆天，嗰度民眾騷亂，總之怨聲載道。
吖，有一單嘢好搞笑，廣州為咗粉飾太平，居然為一眾爛尾樓「穿新衣」，外面似乎冇穿冇爛，裏面其實千瘡百孔。唉，呢家嘢又係富有中國特色嘅弄虛作假，勁過噴綠漆扮綠化。
撇開收地重建呢一筆爛帳唔計，廣州亞運經費要幾多錢呢？當局話就話要辦一屆「節儉亞運」，之但係新建以及改建體育場館嘅投資已經要八十億元人民幣，仲未計其他必需開支。如果香港要辦亞運，成本肯定高過廣州多多聲，計功夫茶話齋，保守估計冇三五百億你都咪使旨意！
嗱，唔好怪功夫茶潑冷水，主辦亞運無疑可以為自己臉上貼金，不過一不小心就會變得尾大不掉。就好似二○一二年倫敦奧運咁吖，○八年北京奧運一落幕，忽然殺出一場金融海嘯，資金緊絀嘅大英帝國忽然之間嚇到傻咗，有人甚至悔不當初喊驚咁話：早知就唔申辦奧運啦！
即係咁，與其好大喜功浪擲幾百億貪慕虛榮，功夫茶寧願你開倉派米接濟百萬窮人咯！