假如閣下自認喪盡天良又冇乜人性，即係禽獸不如嗰隻，功夫茶介紹你一條發財大計。乜嘢發財大計咁巴閉呀？就咁，你只要搭通天地線，加入內地不法集團經營地下六合彩，包你賺盡不義之財，事關每年營業額高達一千至二千億元人民幣，你隨時發過豬頭。
你可能會話，即使埋沒良心肯賺黑心錢，萬一畀執法人員雷厲風行冚賭，捉去打靶點算呀？呢一層大家又可以放心喎，現今有一個非常奇怪嘅現象，地下六合彩賭到全國遍地開花，執法人員唔知點解隻眼開隻眼閉，冚賭嘅速度遠遠不及莊家開賭；你冚一檔，佢開十檔，成個中國淪陷於瘋狂賭禍！
唉，講真嗰句，功夫茶何來閒情逸致教大家為非作歹吖，只係睇唔過眼賭禍誤國，發一發晦氣咁解啫。特別係當你見到地下六合彩害到炎黃子孫家破人亡，嗰種欲哭無淚嘅感覺同當年鴉片害到中國人變東亞病夫冇乜分別。
彩禍重災區最初係廣東一帶，家陣已經極速擴散，除咗西藏之外，各省各市都受到污染。更加離譜嘅係，莊家吸血鬼將魔爪伸入窮鄉僻壤，搞到農村百姓愈窮愈見鬼。賭仔輸到一乾二淨之後，莊家又會採取金字塔層壓式經營，強迫欠債未清嘅賭仔介紹新客，以一帶十，以十帶百，隨時將一條村徹底消滅。
有學者研究過，鄉鎮農村照例係「麻鷹唔管管雞仔」，捉來捉去都係捉賭徒，永遠唔會掃蕩莊家，原因係逮捕賭徒可收罰款，掃蕩莊家等於自閂水喉，為咗「長罰長有」，當然唔會殺雞取卵啦。於是乎，官奸勾結，兵賊不分，懷疑有軍方背景嘅勢力人士甚至中央層級官員，長期包庇地下六合彩。
講到呢度，不得不提幾宗彩禍害人嘅悲慘血案。冇耐之前廣州發生一宗轟動全國槍擊案，有人手持槍械以及爆炸品同公安對峙，最後公安將槍手擊斃。原來死者生前沉迷六合彩，輸光身家之後精神失常，狂性大發自取滅亡。至於中山，又有人賭到天昏地暗，經常因為六合彩問題同老婆發生激烈爭執，最後兩公婆被發現雙雙死於家中，估計係老公先斬死老婆再自殺。湖南郴州有一個退伍軍人，賭到走投無路，鋌而走險搶劫女途人，結果被捕落網。類似事件仲有幾多呢？功夫茶真係答你唔到，因為實在多如天上繁星。
講到喪盡天良又冇乜人性，不得不提壹淫媒老闆淫賤黎，呢條友仔係六合彩禍國殃民其中一個罪魁禍首。有三份港產六合彩報叫做《創富》、《六合皇》同埋《貼士皇》，承印嘅係超企印刷及傳訊有限公司，其中一個董事就係淫賤黎。有人將呢三份六合彩報源源不絕走私運上內地，為彩禍推波助瀾。匪夷所思嘅就係，走私路線來來去去就係嗰幾條，要拉人封艇話都冇咁易，中港兩地執法者硬係唔見得全力取締。
計功夫茶話齋，出咗名反中亂港嘅淫賤黎未必只係想發不義之財咁簡單，話唔定係要利用彩禍害到你亡黨亡國！
官奸勾結，兵賊不分，群魔亂舞，彩禍害人，遍地開花。如果咁就叫做「以民為本」，難怪淫賤黎擺明車馬「以淫為本」啦！