淫賤黎旗下爛果報雖然冇料到，所謂報道不外乎弄虛作假或者左抄右抄，最鍾意就係抄襲東方報業集團，不過有時作古仔又作得幾滑稽㗎，充滿無厘頭娛樂性嗰隻。呢嗱，好似早幾日國家主席胡錦濤喺深圳接見香港富商李嘉誠咁吖，爛果報居然可以上綱上線，頭版大字標題話「李嘉誠惡晒」。
呢啲係乜嘢狗屁邏輯？如果有幸畀胡錦濤見一見就係「惡晒」，四川地震災民一定最惡，事關胡主席唔係接見，而係直接親赴現場探訪。
有人話爛果報老屈「李嘉誠惡晒」係居心叵測挑動「仇商仇富情緒」，分化社會，其心可誅。計功夫茶話齋，呢個當然係部分原因，淫賤黎出晒名反中亂港搞搞震㗎啦，不過其實仲有一個更大嘅原因，就係公報私仇。你知啦，誠哥一向唔妥淫賤黎誨淫誨盜嘅所作所為，所以旗下集團唔會幫襯壹淫媒落廣告。於是乎咯喎，一來懷恨在心，二來變相勒索，淫賤黎係又吠唔係又吠，不斷生安白造攻擊李嘉誠，一心以為咁就可以逼到人哋落廣告吖嘛。
假如吠無可吠，冇嘢借題發揮又點算好呢？呢個淫賤集團心腸毒咯，夠膽死搵個傻婆趁人哋拜山嘅時候大吵大鬧，同自編自導作新聞冇乜分別。
講到呢度，功夫茶覺得台灣政府十分抵讚，堅定不移否決淫賤黎經營電視台。台灣壹淫媒打算開設三條電視頻道，新聞台、娛樂台以及資訊綜合台，四度申請全部失敗，台灣嘅國家通訊傳播委員會（ＮＣＣ）前日正式否決，質疑新聞節目以動畫表達，不符合真實呈現嘅專業要求，又對兒童少年嘅保護處理措施不足。簡單咁講，壹淫媒太淫太暴力，違反社會可接受嘅倫理道德，所以有關當局一錘定音，唔准！
呢嗱嗱嗱，唔該香港政府學下嘢啦，咁先至叫做儆惡懲奸吖嘛。壹淫媒喺香港違反《淫褻及不雅物品管制條例》過百次，連最嚴重嘅三級淫褻都犯過，官老爺莫講話冇拉人封艇，次次罰款都只不過係雞碎咁多，你想話唔係姑息養奸都唔得啦！
台灣政府就唔同嘞，你誨淫吖嘛，重罰！你誨盜吖嘛，重罰！你死性不改吖嘛，嚴禁你隻魔爪插入電視頻道！呢啲咪就係叫做大快人心囉！
講番誠哥嗰筆，有一件事又奇怪喎，爛果報點解唔攞人哋抱孫嗰單新聞大做文章？李家添丁一胞雙胎點解又唔話係「惡晒」？所以話啫，爛果報狗屁邏輯真係無厘頭㗎。
話時話，富商唔肯向惡勢力低頭當然係正氣凜然，唔落廣告係絕對正確嘅，之但係又有另一件事好奇怪，點解中資集團咁鍾意幫襯淫賤黎嘅呢？連革命根據地嘅井岡山都喺爛果報落廣告，叫人去參加「紅色之旅」喎，簡直係匪夷所思。
計功夫茶話齋，全香港真真正正「惡晒」嘅惟有淫賤黎一個，反中亂港又冇人理，為非作歹又有運行，一字不改侵犯東方報業集團版權咩？東方做，蘋果盜，六個月抄足三十九次咩？照例又係冇人主持公道。
你話嘞，講到「惡晒」呢家嘢，淫賤黎認第二，冇人夠膽認第一！