港府反應遲鈍，做嘢懶懶閒，早就唔係乜嘢新聞，依家仲發展到「集體失聰」，對震耳欲聾嘅警報聲置若罔聞，無動於衷，簡直匪夷所思。
乜警報咁嚴重？咪就係藥後駕駛情況失控囉。呢，今年頭五個月本港已錄得二十九宗藥駕個案，比去年全年數字急升五倍，包括吸食Ｋ仔、嗎啡、大麻及可卡因等，有人甚至「四溝」，食齊咁多種藥添，問你驚未？
更得人驚就係，毒禍威脅已經由陸上擴展到海上同空中，形成海陸空「立體攻勢」，當局唔單止冇足夠嘅防範意識，應對措施更加欠奉，直頭係全方位不設防。
嗱，單係上個月，全港發生至少五宗懷疑藥駕個案，有啲迷幻司機鼻哥窿仲有白色粉末，有啲車內發現藏有針筒。至於事發地點更係遍布港九新界，由旺角、銅鑼灣、黃大仙到沙田都有，藥駕氾濫嚴重程度可想而知。
有人話，萬一濫藥司機揸緊架旅遊巴，唔止其他道路使用者面對威脅，車上幾十條人命更係凍過水。亦有人話，假如司機索完Ｋ揸車出街，撞正架運油車，分分鐘上演「一鑊熟」嘅慘劇。
藥駕問題已經變成「馬路炸彈」，而且唔止影響陸上道路安全，連海空交通亦受威脅。呢，今年暑假已揭發多宗海上迷幻派對，萬一掌舵嗰個High high哋，成隻船撞埋大貨輪或者岸邊，你話點算？前排有個任職本港航空公司嘅美籍副機長，被揭發沉淪毒海，但本港法例居然冇授權為機師抽樣驗毒，你話牙煙唔牙煙？
藥駕海陸空襲港，當局點應對？有貨櫃車司機踢爆，曾經遇上懷疑索Ｋ司機，揸住架車好似舞龍咁橫衝直撞，於是報警喇，點知十幾分鐘後都唔見警車到場攔截，簡直離晒譜。
不過咁，即使司機被截停，警察都可能冇佢符，因為警方未必有適合儀器喺現場做檢查，就算有，當事人亦有權拒絕。根據現行法例，要司機自己承認吸毒，而警方亦證實車裏面藏有毒品，至可以要求驗毒。咁嘅戇居法例，迷幻司機梗係當你冇到啦。
好明顯，藥駕問題愈來愈嚴重，係因為港府打擊不力。其實，藥駕唔係香港獨有，其他國家都有辦法對付，唯獨港府束手無策。嗱，澳洲警方可以抽樣為司機作唾液測試；法國警方會喺交通意外後或有懷疑嘅情況下，要求司機做藥物測試；美國執法人員更有權要求可疑司機做血液或尿液測試，甚至將拒絕者當場拘捕。點解人哋做得到，香港做唔到？咪又係因為班官僚懶得就懶，卸得就卸囉。
唉，當局立法打擊藥駕一拖再拖，草案要下個立法年度至提交立法會，幾時實施仲係遙遙無期。咁搞法，等於攞市民條命較飛，豈有此理。
生命冇Take Two，藥駕不可一，不可再。功夫茶想問聲，唔通真係要等到藥駕通街殺人，悲劇反覆重演，港府至肯做嘢？