開講都有話，生養死葬，可惜身為香港人，生養固然難，死葬更加難。
生養有幾難呢？唉，講起嚟十足十咸豐年代紮腳布，又長又臭，臭到連有錢佬都滿腹牢騷。好似自由黨前主席田北俊咁吖，佢狠批政府係孤寒成性嘅守財奴，商界交埋交埋咁多稅款，庫房收埋收埋咁多儲備，高官居然一毛不拔唔肯開倉扶貧，卒之搞到貧富懸殊怨聲載道，累到有錢佬成為民眾仇富對象，食晒死貓咁話。換言之，政府取之於商，而冇用之於民，激到有米一族紮紮跳，冇米落鑊嘅窮苦大眾好容易就會將怨氣發洩喺富豪身上。
至於死葬問題，頭痛咯，簡直係一個頭兩個大。萬一唔好彩餓死咗，可以去邊度安葬呢？政府骨灰龕位供應量幾乎等於零，私人機構又恐怕係無牌經營，一個唔覺意迫遷走鬼，真係做鬼都唔靈！
本來呢，官老爺前一排好有型咁講咗一句「十八區都要有骨灰龕」，唔做得各家自掃門前雪，點不知言猶在耳已經有人阻頭阻勢。最諷刺嘅係，阻頭阻勢嘅唔係對於墳場陰宅充滿迷信忌諱嘅街坊街里，而係教育局。亦即係話，官老爺自己鬼打鬼！
食物及衞生局提出十二個龕場建議，包括將現有鑽石山靈灰安置所擴建。黃大仙區議會有人做過問卷調查，發覺七成居民不反對區內加建龕位，之但係咁，超過六成街坊認為當局必須先解決交通問題，以免孝子賢孫一下子洶湧而至逼爆大街小巷。所以咯喎，原則上已經同意擴建鑽石山龕場嘅黃大仙區議會，就向政府要求喺每年春秋二祭期間，借用鄰近學校用地畀掃墓人士泊車，紓緩塞車情況吖嘛。誰不知，教育局竟然否決，理由係當局唔會動用公帑為非學校活動購買保險。
呢嗱嗱嗱，你話係咪鬼打鬼吖？政府呢頭話要十八區都要有骨灰龕，嗰頭又自己友拖自己友後腿。人哋區議會問你借出學校地方泊車啫，咁都要搵藉口拒人於千里之外。計功夫茶話齋，肩負作育英才神聖任務嘅教育局，呢一嘢都算係為老不尊、教壞子孫咯！
話時話，香港人之所以咁抗拒左鄰右舍出現骨灰龕場，肯定同傳統忌諱心態有關，大吉利是吖嘛。其實教育局最應該做嘅係灌輸正確觀念，教育市民唔好咁迷信，以平常心看待「今夕吾軀歸故土、他朝君體也相同」嘅恒常道理。教育局冇教育已經係失職，家陣仲以身作則提供反面教材，帶頭阻礙龕場擴建喎，十八區都要有骨灰龕嘅偉大承諾死得啦！
所以話啫，家陣嘅香港確係眾生皆苦，窮有窮悲，富有富哀，在生之時冇啖好食，離世之後無法安息。
好心特區政府唔好咁孤寒啦，出錢出力解決生養死葬吖嘛。假如有朝一日唔想食死貓嘅商界富豪上街抗議，匯合孝子賢孫一個二個抬棺材遊行，咁就醜死鬼咯！