生人霸死地大家聽得多，有冇聽過富人霸窮地？如果冇聽過，咁就要聽下喇，事關家陣流行「仇富論」嘛，等大家茶餘飯後有話題吹下水都好吖。
呢嗱，就咁，香港人最關心嘅社會問題首推房地產政策，而特區政府嘅房地產政策往往造成不良後果，譬如話，容許地產發展商「合法呃秤」，明明話賣畀你嘅住宅單位有四百平方呎，實際上只得豆腐膶三百呎多少少。於是乎，香港人覺得你官商勾結，仇富情意結咪愈來愈嚴重囉。
好嘞，由於地產政策千絲萬縷，一環緊扣一環，所以香港就出現一條循序漸進嘅「住屋食物鏈」。簡單咁講，住屋食物鏈係由窮至富逐步遞升嘅，最冇米落鑊嗰班窮苦大眾當然係住天橋底啦，然後住籠屋，然後住公屋，然後住居屋，然後住私樓，然後住豪宅，然後住豪宅，然後再住豪宅。
大家可能會問，功夫茶係咪傻咗？住豪宅就住豪宅啦，點解會分開三次遞升？所以話香港樓市畸形囉，現時嘅所謂豪宅未必係真正豪宅，公屋隔籬又話豪宅，工廠隔籬又話豪宅，全靠包裝呃鬼食豆腐，嚴格而言應該係話「呃鬼食豆腐膶」。你唔分三次遞升，冇可能住到真正豪宅。
突然之間，住屋食物鏈斷咗一環，世界從此變調。「八萬五」房屋政策禍港殃民，樓市崩潰之後政府宣布，停建居屋！
呢嗱嗱嗱，停建居屋本來係為咗救市嘅，之不過咁，呢一個動作產生相當麻煩嘅副作用。以前公屋居民只要收入多咗，自自然然就會計劃升格做居屋業主，即係俗稱嘅上車。富戶搬出公屋之後，其他望穿秋水嘅窮人就可以上樓。冇咗居屋呢一環之後，公屋富戶變咗高不成低不就，私樓貴到死，完全買唔起，惟有繼續住公屋。
公屋富戶有幾多？○二年有一萬一千幾戶，○八年急升至二萬八千戶，○九年因為金融海嘯稍為減少，去到一○年咯喎，又回升至二萬三千七百戶，其中二萬零五百戶繳交倍半租金，三千二百戶繳交雙倍甚至市值租金。即係話，停售居屋前後，富戶數目倍增。
講到呢度，大家明白未？富戶唔搬走，窮人難上樓，呢啲咪就係富人霸窮地囉！
一般相信叫得做悲情城市嘅天水圍公屋梗係窮到燶o架啦，點不知記者走去睇過，當地屋邨不知泊咗幾多名貴房車，反映富戶真係無處不在。
所以話啫，政府嘅房地產政策確係激鬼死人，絕對係仇富情意結嘅罪魁禍首。莫講話普通富戶賴死唔走吖，連月薪六萬元嘅立法會議員長毛梁國雄都繼續住公屋，正在公屋輪候冊癡癡地等嘅草根階層多得佢唔少咯。
好心負責房地產政策嘅相關高官諗諗計仔啦，冇咗居屋作為中轉站，公屋同私樓嘅距離闊到嚇死人，你叫富戶點樣一步登天呢？聽講政府目前計劃推出類似居屋嘅資助房屋計劃，求神拜佛，唔好再戇居居好心做壞事喇！