政情：蔡曉慧食有機菜減壓
人人都追求健康生活，近年愈嚟愈多人主張要食得有機、食得自然。柴灣青年廣場尋日舉辦咗個「有機生活齊體驗」活動，請嚟星級媽咪馬詩慧（Janet）、前香港游泳代表隊隊員蔡曉慧同今年ITU亞洲三項鐵人賽冠軍勞証顯，同大家分享如何將有機飲食同運動結合，卓妮咁注重養生之道，當然要去湊吓熱鬧啦！唔講唔知，原來佢哋好多年前已經開始咗有機生活，不過多數由外國開始。莫非香港要有機真係咁難？
馬詩慧唔熟唔幫襯
蔡曉慧同卓妮講，以前喺美國讀書兼做運動員時，由於壓力大，經常煮飯仔減壓，最鍾意用有機蘿蔔炆牛腩，健康之餘又惹味。而美國早已流行有機生活，所以超市有好多有機蔬果畀佢選擇，佢見有機食物冇農藥同防腐劑，食食吓就慣咗有機。喺新西蘭長大嘅勞証顯就話，大部分新西蘭人都係食有機蔬果，習慣成自然，依家雖然香港冇咁多有機蔬菜可供選擇，但都會叫媽咪揀有機食品，等全家都齊齊健康。
食咗有機蔬菜四、五年嘅Janet仲教大家點揀有機食品。佢話依家市面好多商舖都標榜自己嘅食品係有機，但憑肉眼真係好難分得清，所以佢一般都係幫襯相熟嘅店舖或者大型連鎖店，咁樣實有信心保證！