傳統小店漸式微 點止涼茶成追憶

可惜，時移勢易，涼茶舖呢個陪伴幾代香港人嘅集體回憶，正逐漸式微，睇怕遲早成為絕響。呢，有老牌涼茶舖訴苦，涼茶材料包括雞蛋花、夏枯草等，過去兩年嘅批發價不斷上升，最多漲價達三倍，連用嚟做龜苓膏嘅龜板亦唔例外，兩年間由每斤二百五十元大增至三百八十元，龜苓膏每盅加價三蚊都為唔到本，你話點頂吖？

屋漏偏逢連夜雨，除咗原材料不斷漲價，涼茶舖更飽受「租魔」困擾添。一間喺九龍城經營咗廿幾年嘅涼茶舖老闆表示，由於材料價格同舖租不斷上升，計劃年底結業。講多無謂，睇數字最實際，食環署統計顯示，過去三年涼茶舖數目由五百五十間下降至五百二十間，真係買少見少。

講開又講，今時今日百業艱難，受「租魔」蹂躪嘅傳統小店又點止涼茶舖吖。上個月北角一間著名牛雜店因為敵唔過貴租而結業，大批市民依依不捨，人龍打晒蛇餅。鬼咩，幾年嚟舖租加咗一倍有多，邊個頂得順呀？仲有吖，上海街嘅婚嫁用品店、上環摩羅街嘅古董店，好多都因為捱唔住貴租黯然離場。

正所謂，一損俱損，傳統小店固然難捱，就算獲得米芝蓮推介嘅著名食肆，亦唔好得去邊嘅咋。正如業界人士話齋，食肆打響名堂後業主往往見獵心喜，獅子開大口瘋狂加租，搞到有啲米芝蓮食肆都要被迫執笠，問你服未。

一葉知秋，特色小店執吓一間又一間，只係高地價、高樓價、高租金嘅「三高」政策下發展畸形嘅縮影。上一輩人形容香港「銀行多過米舖」，家陣米舖已經成為歷史陳迹，呢句話改為「藥房多過銀行」就差唔多。唔係咩？依家放眼望去，唔係藥房就係金舖，唔係化妝品店就係影音店，成個香港幾乎係連鎖店嘅天下，千篇一律，毫無特色可言。難怪有人話香港已經逐漸「妖mall化」，真係冇講錯o架。

正如古詩所云：「此情可待成追憶，只是當時已惘然。」好多人批評香港旅遊資源不足，其實，呢啲充滿本地特色嘅傳統小店唔止係最好嘅旅遊資源，而且係最好嘅文化資源及最好嘅歷史資源，可惜港產官僚暴殄天物，唔識得好好保護，坐視呢啲特色逐漸消失，實在愚不可及。