「官官相衞」係官場常態，官員為咗自保或者包庇自己友，不惜擘大眼講大話，大家早就見怪不怪咯。呢，民航處咪就係當中嘅典型囉。
件事係咁嘅。本報舊年揭發民航處豪花五億元向美國雷神公司買入一套新航空交通管理系統，傳聞有份參與審批標書嘅民航處高層梁沛光，離職後加入雷神喺香港嘅分判公司。當時本報向民航處查詢，該處回覆話梁沛光冇份審批，點知事隔唔夠一年，民航處又改口承認梁係審批標書成員之一。嗱，當中究竟有乜嘢蠱惑，大家心照喇。
民航處講大話都算嘞，仲死撐話當時提供嘅資料唔清晰喎，簡直侮辱市民智慧。正如有立法會議員話齋，民航處隱瞞事實好唔尋常，懷疑有更高層包庇下屬。而有位曾做過廉署總調查主任嘅大律師更加質疑，梁沛光審標時係咪已經接受私人機構聘請？當中有冇涉及延後利益？佢又有冇申報利益？冇錯嘞，如果唔係涉及利益輸送，民航處使乜隱瞞真相吖！
其實，成件事由頭到尾都唔尋常。呢套新航管系統問題多多，成日故障，有用開呢個系統嘅印度空管人員去信提醒香港民航處千祈唔好買，點知民航處一於懶理，結果大拿拿使咗五億元買返嚟嘅系統，兩年後嘅今日依然有得睇、冇得用，你話審標過程冇蠱惑，細路仔都唔信喇。一句講晒，成單嘢疑點重重，唔止審計署要查一查盤數，廉署更加要介入徹查。
係人都知，「貪曾」曾蔭權在位時大玩官商勾結、利益輸送，已經搞到官場烏煙瘴氣，如果廉署繼續任由呢股歪風蔓延，坐視民航處官官相衞藏污納垢，成個港府遲早變成貪官俱樂部嘅咋，到時香港同內地睇齊，一國兩制想唔玩完都幾難！
講開又講，民航處醜聞多多，又點止呢單吖。好似坐落赤鱲角機場嘅民航處新總部，足足使咗二十億元，被本報多次踢爆極盡奢華，浪費公帑。當中最令人嘆為觀止嘅首推佔地六百呎、設有三面牆身玻璃同芭蕾舞扶手嘅專業舞蹈室嘞。民航處唔係康文署，點解無端端整個舞蹈室出嚟呢？原來據傳當年嘅處長太太係舞蹈發燒友，於是咪有人因利乘便，整多個舞蹈室囉，反正又唔使自己畀錢，何樂而不為吖。
民航處口口聲聲要將香港打造成國際同區域頂尖航空中心，其實計功夫茶話齋，民航處班高官咁識享受，不如改行將香港打造成吃喝玩樂中心仲實際啦。無論點都好，民航處講大話包庇前高層呢單嘢，一定要有個交代，絕對唔容許蒙混過關！