「清明時節雨紛紛，路上行人欲斷魂」，兩句唐詩本來係形容孝子賢孫思念先人嘅心情，但對於香港人嚟講，真係別有一番滋味在心頭。
大家都知道，清明節拜祭祖先係中國人慎終追遠嘅傳統美德，之但係今日好多香港人生無立錐之地，死無安息之所，搵個骨灰龕位都難過登天，仲點樣慎終吖？又點樣追遠吖？清明拜山亂紛紛，香港人有乜法子唔「斷魂」！
呢，尋日立法會會議上，有議員要求食衞局局長高永文唔止要制訂長遠房屋策略，亦要有長遠「陰宅」政策，唔係冇理由。正如議員話齋，前朝曾蔭權爵士曾誇下海口要喺十八區起骨灰龕只係「發晦氣」，根本無可能實現。
高永文點解畫呢？佢話喎，政府正陸續就各區興建公營龕位嘅選址進行諮詢，如果順利，預計十年後可以推出大量公營龕位。佢又話，政府今年初已放寬龕位加放骨灰嘅限制，容許非近親但有密切關係包括同居者共用龕位。
議員唔提起，好多人可能已經唔記得十八區建骨灰龕呢個笑話。貪曾○八年提出呢項建議後就關人個關，計劃一直無聲無息，直到去年底食衞局終於承認，喺建議嘅廿五個選址中，只有三個獲得區議會明確支持，即係話其餘廿二個仍然係無米粥，簡直得啖笑。區議會諮詢階段已經阻力重重，高永文所謂「如果順利」，未免太過樂觀，再講喇，就算一切順利，都要等十年至有大量龕位供應，遠水難救近火啦。
至於容許與非近親人士合葬，更加不知所謂。中國人最忌「撈亂骨頭」，夫妻合葬就可以理解啫，連兄弟姊妹都少見，莫講話冇血緣關係嘅「外人」。當局承認，自今年初放寬共用龕位限制後，只係批准咗兩宗申請，證實呢項計劃根本九唔搭八。
當局喺增加公營骨灰龕方面固然束手無策，規管私營骨灰龕同樣一塌糊塗，近年私營骨灰龕場喺工廈、廟宇、私樓遍地開花，亂象叢生，市民根本冇辦法分清邊啲合法邊啲違規，搞到怨聲載道。高永文應承第二季提交規管私營骨灰龕條例草案畀立法會審議喎。仲有冇遲啲吖！
喂，依家又唔係叫你哋上太空探月球，只係增加骨灰龕位供應啫，咁簡單嘅問題居然由前朝周一嶽做局長時拖到今屆政府，仲話要再等十年至可大量供應，都唔知好笑定好嬲。旨意呢班港產官僚，你話係咪死得人多吖！
所以話，今時今日嘅香港，生亦難，死亦難，諗落都可悲！