有人話香港人係經濟動物，睇錢大過天，公共利益就關人個關，功夫茶絕對唔同意呢個講法。嗱，就講垃圾徵費吖，有環保團體做過調查，超過六成受訪市民表示支持，證明只要有利環保，市民唔介意付出代價。問題係，市民願意作出犧牲，港府又可以做到啲乜呢？
千呼萬喚之下，垃圾徵費計劃家陣總算有啲眉目嘞。當局昨日公布選定「白老鼠」試點計劃，涉及七個屋苑約一萬戶家庭，其中有公屋、有私樓同埋居屋，夠晒代表性。當局會試行三種不同嘅徵費方法，包括按幢按重、按幢按桶及按戶按袋，最快六月展開，半年後檢討，睇吓唔同模式會有乜嘢成效，例如垃圾量會否減少，回收廢品量會否增加等等。
點解要試點呢？環境局局長黃錦星話喎，各屋苑嘅減廢目標成功與否唔重要，重要係收集「實戰」經驗，收集到嘅數據交由可持續發展委員會總結。咁即係點？即係未戰先降囉，港府口口聲聲話推行垃圾徵費，可以寓禁於徵，從源頭減少垃圾，仲搬出台灣、南韓等成功例子加強說服力。好喇，拖拖拉拉一大輪，終於推出試點計劃，但之後又係總結，又係檢討，隨時試完再試，咁幾時先至可以正式推行呢？
睇真啲，當局所謂收集「實戰」經驗，其實並非打真軍，而係模擬性質咋，原因係垃圾徵費尚未立法，所以「徵費」只係記帳，並非掏出真金白銀。既然當局做騷咁做，收集到嘅數據有冇參考價值，不問可知。好似一個人玩電腦駕駛遊戲，幾叻都好，同駕駛真車出街根本唔同一回事。唔怪得環保組織質疑，參與試點計劃嘅居民毋須付出一分一毫，未必可以真切體會不同收費方式嘅優劣，「好難講到成效」。
即係咁，保護環境，人人有責，大部分市民唔介意為環保出錢出力，問題係港府自己都信心不足，仲要未立法先試點，盞嘥氣嘅咋。講真，垃圾徵費唔係好似一國兩制咁嘅新鮮事物，其他地方早就實行，有豐富經驗，港府「拿來主義」即可，使乜繼續摸住石頭過河，呢度試點，嗰度總結，到真正實行嗰陣蚊都瞓，蛇都死，香港一早垃圾圍城嘞。
話時話，處理垃圾係系統工程，唔係徵費就搞得掂，始終都要多管齊下，搞好垃圾分類、回收配套、擴建堆填區、興建焚化爐及公民教育缺一不可。要想治標又治本，功夫茶有個建議，就係對環保官僚進行廢物分類，將人形垃圾推落堆填區，咁垃圾問題或者有解決嘅希望。