古人話，禁而不止，則刑罰侮。真係冇講錯，內地舊年十月起實施《旅遊法》，嚴禁「零負團費」，一度令購物團數目大減，點知風聲一過，最近購物團又死灰復燃，問你服未。
係咁嘅，中央電視台近日接到內地居民投訴，話收到一張「四日三夜港澳旅遊券」，旅行社聲稱獲得香港旅發局同商家贊助，旅客可用二百多元人民幣嘅「優惠價」，參加原價三千九百八十元嘅港澳遊，結果被強迫購物，花成萬元買咗一批次貨劣貨，貼錢買難受。央視記者根據線索放蛇，果然發現好多劏客黑幕，旅客唔止被迫購物，導遊甚至將唔肯參加自費項目嘅記者趕走。
購物團百足之蟲，死而不僵，一啲都唔奇怪。早喺《旅遊法》實施前夕，功夫茶已經指出，由於法例規定只要旅客同旅行社事先簽署協定，購物團就唔算違法，擔心不良旅行社會利用呢個漏洞大鑽空子，令法例變無牙老虎，依家果然不幸而言中。
當然啦，一個巴掌拍不響，無論旅行社點樣出蠱惑，都要有旅客肯上釣至得。二百幾元人民幣遊港澳四日三夜？咪玩啦，邊有咁大隻蛤乸隨街跳吖，莫講唔夠畀酒店錢，交通費都唔夠啦。香港向有購物天堂之譽，「購物」本來冇問題，最弊係旅行社指定嘅所謂購物點，往往唔係港人常去嘅購物商場，咁就有問題喇。就講今次涉事旅行團指定嘅珠寶店吖，店內居然連窗戶同走火通道都欠奉，似囚室多過似舖頭，唔買夠指定金額唔放人。事實上，好多呢類珠寶店「門衞森嚴」，一見本地人光顧即刻耍手擰頭，你話冇蠱惑就假咯。
「殺頭生意有人做，蝕本生意冇人做」，旅行社扭盡六壬都要搞購物團，講到底都係錢作怪。呢嗱，涉事內地領隊自己都認，每做成一單生意，旅行社抽佣三成，領隊亦可分百分之二。大家試諗吓，今時今日有乜嘢生意咁好賺吖？難怪旅客使咗成萬元只換來大堆次貨劣貨喇。
不過話分兩頭，內地法例有漏洞，內地當局監管不力，加上部分旅客貪小便宜，佢哋固然有責任，但唔代表港府可以翹埋雙手乜都唔理。正所謂「只要精神不滑坡，辦法總比困難多」，如果當局真係有心打擊劏客團，可以有好多方法，央視放蛇揭發香港購物團亂象已經唔係第一次啦，當局大可照辦煮碗，派人放蛇，搜集證據，不法分子自然無所遁形。
仲有吖，香港已經實施《商品說明條例》，之前有店舖只係因「特價」貨品貴過原價幾毫就被罰一萬蚊，購物團旅客被迫購物閒閒哋講緊幾千蚊甚至幾萬蚊都有，當中唔少涉及貨不對辦，當局點解捉小放大呢？
近排香港發生連串驅蝗辱客事件，主要因為有市民不滿旅客逼爆購物區。其實計功夫茶話齋，如果當局繼續對宰客黑店放軟手腳，自拆購物天堂招牌，遲早冇人上門，睇吓仲有冇人驅蝗吖喇！