今時今日，執政者最緊要識得靈活變通，因時制宜。近年本港樓市持續上升，屢創「癲價」，市民怨聲載道，無殼蝸牛望天打卦，現屆政府上場後即連環出招，不斷加辣，結果成功令樓市顯著降溫。不過時移勢易，家陣環境轉變，樓市交投淡靜不在講，加息周期又即將來臨，當局幾時開始減辣或者撤招，愈來愈令人關注。
嗱，多家大行同埋學者不約而同指出，今年樓市有機會再跌一成至一成五，假如未來兩三個月樓價加速向下，而美國退市步伐又加快，港府就應該考慮撤招。而國際貨幣基金組織亦提醒，隨着美國加緊退市，二○一六年底美國聯邦基金利率可能升至四厘，必定對本港樓市帶來更顯著嘅負面影響，港府有必要逐步撤招，穩定樓市。
正所謂，思則有備，有備無患。外圍環境轉變，加上本港房屋供應將會逐步增加，依家係未雨綢繆、制訂應變措施嘅時候喇。正如「東方報業民意調查」顯示，三成七受訪者認為現在是適當時機逐步減少辣招；一成八指應未雨綢繆，部署減辣策略；一成三認為美國加息勢必影響樓市，不容忽視。不過，亦有兩成半人認為毋須減辣，見仁見智喇。
講開又講，港府推出嘅所謂「三辣招」，包括額外印花稅、買家印花稅及雙倍印花稅，當中影響最廣、落藥最重就係雙倍印花稅，令唔少原本想入市嘅準買家望而卻步。難怪三成九受訪者認為應優先減少雙倍印花稅；兩成三認為應優先減少額外印花稅；認為應減少買家印花稅嘅只有一成七。即係話，減辣應該制訂先後次序，按部就班。
當然喇，喺泛政治化嘅今日，港府施政備受掣肘，就算想減辣都唔係咁易嘅咋。呢，由於立法會議員玩拉布，搞到依家仲未通過雙倍印花稅草案，政客阻住地球轉，港府根本無能為力。上述民調顯示，三成九受訪者認為應盡快通過草案，方便調整；兩成九擔心阻礙樓市下跌時迅速減辣；兩成三憂慮無法將震盪減至最輕。
講到底，香港樓市搞成咁，都係拜前朝政府所賜。三成九受訪者批評前朝扣地不起樓，導致市場失衡；三成四直指政策失敗，官商勾結；兩成二指摘高地價政策遺禍。無論點都好，往者已矣，來者可追，現屆政府撥亂反正固然正確，但行政措施畢竟只係權宜之計，要徹底解決樓市問題，除咗增加供應，最緊要係因時制宜，靈活變通，唔能夠一本通書睇到老，亦唔能夠臨急抱佛腳。當年「八萬五」嘅教訓仍歷歷在目，千祈唔好重蹈覆轍呀！