喺咁多政府部門之中，食環署歷來係醜聞最多嘅一個，幾乎年年都係投訴榜冠軍，懶散、蛇王、瀆職、執法不力等等，無奇不有。正所謂，面係人哋畀，架係自己丟，食環署管理混亂，烏煙瘴氣，大家早就見怪不怪，但估唔到嘅係，該署為咗粉飾櫥窗，竟然弄虛作假玩篤數，問你服未。
件事係咁嘅，早前食環署聲稱公眾街市空置率改善，整體出租率達到九成，好多人信以為真，點知有政黨踢爆，當中並唔包括將會進行整合或改善工程而要凍結出租嘅空置攤檔，即係話，九成出租率純粹吹水嘅咋，信佢一成，雙目失明吖！
話時話，食環署部分街市空置率長期高企，有啲出租率只有四成，其中七個街市曾被審計署點名批評經營欠佳添。政黨到過曾被審計署批評嘅荃景圍街市進行調查，發現附近四成居民從未到過該街市購物，九成四人贊成將部分空置街市改作社區設施用途。嗱，呢啲就係真相喇，食環署虛報出租率，唔係篤數又係乜？
老實講，如果公眾街市出租率真係達到食環署所講嘅九成，又點會年年蝕本，而且愈蝕愈多吖。以今個財政年度為例，食環署數字顯示，轄下七十幾個街市共一萬四千幾個檔位，逾一萬三千個租出，話就話空置率改善，但管理虧損不減反增，預料全年蝕二點三六億元，較上個財政年度擴大百分之七點四，簡直慘不忍睹。
係人都知，香港地寸土寸金，市區求其一個舖位仔月租都數以十萬元計，業主個個豬籠入水，而食環署就長期做蝕本生意，街市年年見紅，話佢哋係敗家仔，一啲都冇誇張。有因必有果，街市年年見紅無非兩個原因啫，一係管理欠佳，一係空置率高，食環署本來想掩人耳目，結果自暴其醜。
最好笑嘅係，食環署為咗補鑊，除咗計劃聘請顧問公司研究街市定位及改善建議，仲話要投放三千多萬元改善五個街市嘅通風及照明系統喎。咁就奇喇，所有問題都出喺食環署身上，佢哋自己唔查找不足，反而想搵顧問研究定位，可謂九唔搭八，隨時連顧問費都蝕埋吖。
今時今日，房屋問題嚴重，港府為搵地起樓而出盡法寶，甚至被人鬧「盲搶地」，而食環署就生人霸死地，任由大量街市空置，你話係咪離譜吖？計功夫茶話齋，食環署與其搵顧問研究所謂街市定位，不如將嗰啲十室九空嘅街市交番畀政府，改為興建公屋又好，賣畀私人發展商又好，點都好過畀食環署浪費喇，係咪！