以前本港食肆多數有個標語牌，提醒大家注意環境衞生：「隨地吐痰乞人憎，罰款二千有可能。」到咗今日，港人衞生意識大大提高，呢啲標語牌早就成為集體回憶咯。不過咁，隨着內地旅客愈來愈多，家陣唔止有人隨地吐痰，而且有人隨地便溺添，香港隨時要重新掛起標語牌，仲要寫明：隨地便溺乞人憎。
功夫茶唔係亂噏。日前又有一對內地夫婦安排幼童喺旺角街頭便溺，有途人影相而發生衝突，混亂之間有人跌倒，搞到要報警求助，兩夫婦最後被帶署調查。相關片段經過網上熱播後，引起兩地居民罵戰，激化中港矛盾，連官方傳媒亦加入戰團，有內地網民仲發起六月一日後罷遊香港添。
話時話，近年類似衝突無日無之，今次事件只係冰山一角咋。由於兩地文化背景及生活習慣唔同，部分內地客行為粗鄙，唔守規矩，確實令人側目，而部分香港人表現偏激，上綱上線，刻意針對內地客，同樣值得商榷。就以今次事件為例吖，呢對內地夫婦安排幼童當街便溺固然唔啱，但佢哋識得用尿片包住，比起有人喺地鐵車廂或店舖就地解決，都未至於太離譜，之所以搞到滿城風雨，甚至成為國際新聞，皆因各走極端，小題大做。
所以話，天下本無事，庸人自擾之。好多時候就係因為大家心存偏見，互不包容，先至將小事化大，大事化到滿城風雨啫。冇錯，內地旅客愈來愈多，確實帶來唔少問題，出現唔少亂象，影響港人正常生活，之不過咁，旅遊業係本港經濟支柱之一，好多市民靠佢食飯，香港究竟係需要清淨，抑或需要發展經濟，大家真係要好好諗一諗。今時今日，其他國家都大力發展旅遊，爭相吸引內地旅客，唯獨香港有人嫌旅客太多，一時驅蝗，一時拖篋，搞到七國咁亂。
當然喇，人必自侮而後人侮之，內地客被視為「蝗蟲」，自己亦要好好反思。近年內地當局不斷提倡文明旅遊，要求旅客注意言行舉止，可惜對牛彈琴，部分內地客目中無人，以為有錢大晒，排隊打尖、大聲喧嘩、亂揼垃圾、隨處便溺等等，早就臭名遠揚。面係人哋畀，架係自己丟，中國經濟崛起，文明墮落，就算有錢都畀人睇唔起喇。
無論點都好，中港居民摩擦無日無之，矛盾不斷惡化，對雙方都唔係好事，尤其對香港旅遊業更加係一種危機，再咁落去，想搵人上門都幾難。點樣解開呢個死結，兩地居民固然有責任，兩地政府更加責無旁貸，大家都唔想搞到水火不容！