又有幼稚園「被執笠」，講起真係可悲。今時今日地產獨大，教育難敵貴租，幼稚園立錐無地，執吓一間又一間，令人既無奈又唏噓！
話說喺天水圍嘉湖山莊經營廿一年嘅德怡中英文幼稚園，下學年不獲續租而被迫停辦，家長大感徬徨，紛紛為子女叩門撲位，搞到狼狽不堪，有人甚至傷心落淚添。同其他「被執笠」嘅幼稚園一樣，德怡廿一年來捱過唔少風浪，偏偏敵唔過貴租，即使校方願意由原本月租二十六萬元加到四十六萬元，幾乎一倍咁滯，亦不獲續租，你話係咪無奈吖？
雖然該校舍由另外一間出得起貴租嘅私營幼稚園承租，學生可以轉去新校，唔使擔心冇書讀，弊在學費每年貴逾萬元，對於基層家庭嚟講，負擔都咪話唔重。有班家長睇唔過眼而發起救校行動，計劃向教育局發起一人一信及靜坐喎，其實計功夫茶話齋，喺地產獨大嘅今日，幼稚園任人宰割，教育局坐視不理，救校行動盞嘥心機嘅咋。
係人都知，喺高地價、高樓價、高租金嘅「三高」之下，近年難敵貴租而「被執笠」嘅幼稚園多不勝數。香港總共有八百幾間幼稚園，其中約四分之一位於私人屋苑或商廈，淨係租金就佔咗開支一大橛，加上有啲業主獅子開大口，租金長升長有，搞到非牟利幼稚園愈來愈難經營。好似荃灣有間歷史悠久嘅幼稚園咁吖，校舍月租本來係十萬元，後來租金一次過加到近三十萬元，幾乎等於全校嘅總收入，問你點頂。
話時話，以天價租金搶舖經營嘅現象，過去一般只見於金舖、影音店及其他連鎖店，依家連幼稚園都出現搶租及迫遷潮，究竟點解呢？有教育界人士就話嘞，近年私營幼稚園有利可圖，佢哋唔收政府學券，教育局不能為其學費設上限，既然有咁嘅優勢咯喎，咪出得起貴租囉。正所謂，羊毛出自羊身上，幼稚園捱貴租，自然要加學費收回成本，受害者始終都係家長及學生。所以話，政府資助租金又好，推行學券又好，到頭來都係益咗業主嘅咋。不過冇法子喇，家陣全香港都為地產商打工，邊個可以例外吖！
講到底，要解開呢個死結，唯一辦法係盡快落實十五年免費教育，包括為非牟利幼稚園提供校舍，咁先至可以徹底解決幼稚園面對嘅加租及迫遷潮。十年樹木，百年樹人，教育關乎社會嘅前途，如果連教育都不敵地產，連幼稚園都苦無立錐之地，試問香港仲有乜嘢前途可言呀？內地當局都識得講再窮不能窮教育喇，唔通窮到只剩下錢嘅港府連教育都唔肯投資？