孔子話過，有教無類。意思好簡單，教育應該不分貧富貴賤，一視同仁。可惜嘅係，當今社會一切向錢看，乜都講產業化商品化，連幼稚園亦唔例外，有教無類得個講字嘅咋。
呢，經營廿一年嘅天水圍德怡中英文幼稚園不獲續租而面臨結業，除咗反映幼稚園被搶校舍嘅悲哀，亦揭露承租校舍嘅另一間幼稚園未註冊就懷疑偷步收生，搞到家長無所適從。教育局局長吳克儉係咁講嘅，校舍未註冊前不得取錄學生，下月一日前學校只能收取最多六百幾元留位費，不能收取其他費用喎。而該幼稚園就否認偷步收生，仲強調學費及雜費同舊校差唔多，就算增加，加幅亦唔會超過百分之五咁話。
其實，有冇偷步收生仲係次要，新幼稚園為咗吸引學生而暫時唔敢加太多學費亦好正常，家陣最大嘅問題係，羊毛出在羊身上，幼稚園以貴租搶校舍，成本遲早會轉嫁畀家長，今年唔加咁多學費啫，出年就好難講咯。正如有幼兒教育人士話齋，今次係第一次有教育團體以貴租搶奪人哋嘅校舍來擴張，可能引起惡性競爭，將教育推向商品化。
冇錯嘞，此例一開，如果其他業主有樣學樣大幅加租，實行價高者得，隨時有更多幼稚園被迫關門咋。就算唔關門，大部分學費用於支付租金，亦必定會影響教學質素喇。唔係危言聳聽，喺一片加租狂潮之下，除咗德怡面臨結業，近日亦有兩間位於元朗錦綉花園嘅幼稚園不獲續租而需搬遷或停辦，幾百名學生慘變人球，都咪話唔徬徨。
講起真係可悲，今時今日乜都金錢掛帥，醫療要產業化，教育亦要產業化，搞到充滿銅臭味。呢嗱，高等院校濫開副學士課程，將學生當成提款機；而中小學就紛紛轉為直資，大搞貴族教育；依家連幼稚園都以貴租搶校舍，學生變成人球，再咁落去，教育遲早變成有錢人嘅專利。話就話當局推行學券制，變相由政府資助幼稚園，弊在校舍租金愈來愈貴，學券嘅最大受益者咪又係地產商同業主。唔怪得有人話全香港都為地產商打工，真係冇講錯。
歸根究柢，呢啲教育亂象係前朝政府造成。當年貪曾好大喜功，將教育列為六大產業之一，話要將香港打造成區域教育樞紐喎，結果教育產業無影無蹤，唯一嘅效果就係鼓勵學校唯利是圖，學生成為受害者。始終都係呢句，教育係長遠嘅投資。幼稚園商品化絕對唔係一種健康現象，政府有責任撥亂反正，令教育重回正軌。係呢，究竟幾時至可以推行十五年免費教育！