風水學上有句術語，叫做「山管人丁，水管財祿」，即係話有水就有財，真係好靈。呢，港府咪就係準備借水生財囉。
話說今年二月財政司司長曾俊華宣讀預算案時表明計劃加水費，話口未完，發展局局長陳茂波尋日喺立法會上聲稱，水費已經十九年冇調整過，稍後會就加水費計劃諮詢立法會，目標係逐步收回成本咁話。
唉，呢個政府做正經嘢又唔見咁積極，加價就坐言起行，如果佢哋肯用一半咁嘅「魄力」，睇怕講咗N年嘅產業多元化早就成事咯！
點解要加水費？政府話主要因為供港東江水成本愈嚟愈高喎。冇錯，二○○九年至二○一三年短短四年間，東江水累積加價兩成六，跑贏通脹九條街，但無論點都好，呢個都唔能夠成為港府加水費嘅理由。取之於民，用之於民，政府服務市民天經地義，點可以樣樣都話要收回成本嘅呢？
再講吖，東江水即使再貴，以舊年價格計，一年都係三十九億元啫，對於窮到只剩下錢嘅港府嚟講，九牛一毛而已，當局絕對有能力亦有責任為市民提供食水補貼。不可不知，補貼水費係世界各地嘅慣常做法，就算印度咁貧窮落後，都用公帑確保國民可享用便宜食水，港府庫房水浸竟然同市民斤斤計較，真係豈有此理！
講開又講，港府明年初將同內地檢討東江水價，到時或會爭取將供水模式由現時「統包總額」改為「按量計算」，即係根據香港實際需要供水，用幾多買幾多。計功夫茶話齋，按量計算除咗慳錢之外，更重要係環保。香港花錢買東江水，但經常用唔晒而要流入大海，淨係舊年就多達九千萬立方米，可以裝滿十五萬個標準泳池，你話係咪浪費吖？係咪唔環保吖？
港府可唔可以同內地商討按量計算東江水，仲要拭目以待，但最重要嘅係，無論供水成本幾高都好，政府都唔可以用「收回成本」為由向市民開刀。係人都知，食水係市民最基本嘅生活必需品，上至富商巨賈下至升斗市民，邊個唔需要食水？如果供水服務要收回成本，其他政府服務都照辦煮碗，市民豈不是冇啖好食？
最令人反感嘅係，水務署一方面大喊「收回成本」，好似好慳家咁，其實自己正正係浪費大戶，全港老舊水管漏嘅漏爆嘅爆，每年都唔知浪費幾多公帑，水務署該當何罪吖？
功夫茶奉勸港產官僚，唔該下次再講「收回成本」之前，先檢討一下納稅人花咁多錢養你哋係咪物有所值啦！