開講有話，錯就要認，打就企定。如果有人犯錯，而且係錯到害死人嗰種，居然唔肯認錯，拖到三年幾之後先至登門道歉，大家認為佢係唔係誠心認錯？又會唔會真心悔改呢？
功夫茶講緊邊個，唔使講大家都知啦。馬尼拉人質慘劇發生三年幾，菲律賓當局終於派人來港道歉，包括馬尼拉市長埃斯特拉達、菲律賓內閣成員，分別代表馬尼拉市及總統阿基諾三世，據講會向受害者合共賠償約二千萬港元，今日同死者家屬見面，聽日同港府簽署道歉協議喎。
對比之前嗰幾場道歉騷，今次菲方派來嘅團隊陣容較大，官員級別亦較高，如果真係可以達成共識，相信港人都樂見其成嘅。畢竟人質事件發生咁耐，死者家屬同傷者心力交瘁，大家都希望盡快解決件事。
之但係，願望歸願望，現實歸現實，菲律賓當局嘅道歉係真定係假，仲要打個問號。正如古人話齋，君子易處，小人難防，菲律賓嗰個三世祖總統無嘢叻，最叻就係嬉皮笑臉耍花樣，呢幾年來，香港人已見識過唔少，信佢一成，雙目失明吖。
最奇怪嘅係，菲方官員話就話登門道歉，但死者家屬同幸存者事前居然毫不知情，遲遲未收到通知，究竟菲律賓當局葫蘆裏面賣咩藥呢？仲有呀，成團人到埗之後粒聲唔出，記者十問九唔應，反而出發前向當地傳媒詳細交代，佢哋究竟想同邊個道歉呢？
嗱嗱嗱，馬尼拉市長自爆，今次來港係為咗保護在港嘅十六萬名菲律賓傭工。換言之，對香港道歉係假嘅，保障菲律賓利益至係真嘅，佢哋嘅態度之所以軟化，主要係擔心港府擴大制裁措施啫。
所以話，面對無賴政府，講道理係冇用嘅，惟有實施經濟制裁，還以顏色，至可能令無賴跪低。可惜港產官僚猶豫不決，拖拖拉拉，制裁唔湯唔水，對方最多只係半跪咋，又有幾大意義呢？
諗起實在悲哀，菲方無賴，港府軟弱，拖到今日先至有啲啲進展。最可憐係死者家屬，為咗替親人討回公道，幾年來不斷奔走勞碌，面對呢個遲來的道歉，就算接受，都係無奈。
講多無謂，食多會滯，死者家屬同傷者一早講咗，四點要求絕對不可退讓，包括菲律賓政府必須道歉、賠償、懲罰失職官員及保證同類事件唔再發生。唔該港府謹記捍衞港人權益，千祈唔好又畀無賴蒙混過關吖。