俗語話，錢唔係萬能，冇錢就萬萬不能。香港垃圾為患，圍城危機迫在眉睫，港府束手無策，淨係識得向錢看，話要透過垃圾徵費減少固體廢物喎。呢，環境局明日將會公布參加垃圾徵費先導計劃嘅大廈名單及細節，睇怕市民點都走唔甩嘅喇。
即係咁，為咗環保，相信多數市民唔介意付出代價，問題係，徵費係咪可以大量減少垃圾，解除圍城危機，真係令人懷疑。冇錯，其他地方有唔少成功例子，好似台灣咁，實行垃圾袋收費之後，固體廢物確實少咗，不過一處鄉村一處例，呢套制度喺香港行唔行得通，仲要睇過至知。首個試行垃圾徵費嘅屋苑淘大花園最近就三個徵費方案進行調查，發現超過七成住戶傾向按戶計費、購買垃圾袋，而傾向整幢大廈按體積或重量計費嘅住戶只有三成，即係話，住戶寧願選擇較麻煩同複雜嘅方案，換取較大減費誘因。
調查結果好明顯，就算市民支持垃圾徵費，亦唔希望收費太高。其實，無論市民選擇邊個方案，亦無論垃圾徵費係咪行得通，都冇可能解決所有問題，香港地少人多，堆填區及焚化爐始終無可避免，港府嘅三堆一爐繼續拖落去，大家都無運行o架。
所謂三堆一爐，即係擴建三個堆填區及喺石鼓洲興建焚化爐，當局以綑綁形式提上立法會，由於反對聲音好大，雖然日前過咗環境委員會一關，但仲要過工務小組及財務委員會兩關，一啲都唔樂觀。為咗減少社會阻力，當局前排放風話考慮向受到三堆一爐影響嘅居民減免垃圾徵費，環境局局長黃錦星仲話最終意向視乎可持續發展委員會嘅報告添。不過咁，委員會主席陳智思接受本報專訪時講到明，冇收過通知要負責埋三堆一爐，只會就垃圾徵費提出大方向建議，包括減免三堆一爐垃圾徵費在內嘅具體細節同技術性問題，全部由環境局決定。換句話講，期望減免垃圾徵費嘅市民睇怕要落空咯。
講開又講吖，以減免垃圾徵費作利誘，博三堆一爐方案過關，根本就係一廂情願。好簡單，淨係邊啲市民有份減免，邊啲市民冇份，都有排拗喇。話到尾，三堆一爐方案陷入困局，完全係當局自己造成，舊年擴建三個堆填區方案首次提交立法會，屯門同打鼓嶺方案本來爭議唔大，弊在當局舉棋不定，臨時撤回將軍澳方案，搞到其餘兩區居民扯晒火，最終三個方案齊齊落空。如果今次再搞個減免垃圾徵費方案出嚟，隨時被指唔公平，盞捉蟲嘅咋。
無論點都好喇，廢物問題始終要解決，唔擴建堆填區，唔興建焚化爐，唔通真係要等垃圾圍城咩？究竟點樣解決，港府固然要認真諗諗，議員亦唔好淨係識得反對，而市民同樣要作出選擇，香港大家都有份o架！