「怪獸家長」一詞源於幾年前日本一套電視劇，形容嗰啲以自我為中心、郁吓就投訴學校及教師嘅家長。大家咪以為淨係做戲吖，喺現實當中，怪獸家長確實存在，而且愈來愈多添。
呢，有教育團體調查發現，近四成受訪教師過去半個學年內曾遭家長投訴，近三成被投訴一至兩次，另有近六成受訪教師曾協助處理投訴個案，當中一成二需處理五宗或以上投訴。家長究竟投訴乜嘢呢？簡直五花八門，無奇不有。有人投訴幼稚園考試不設排名，有人投訴飯盒供應商安排學生午飯食薄餅唔健康，有人投訴學生功課太多；甚至有人投訴上學時段交通擠塞，要求學校特准其子女每日上學遲到五分鐘。好明顯，有啲投訴合理，有啲屬於無理取鬧，唔怪得唔少受訪教師指家長嘅投訴多數不合理，而且態度及語氣欠佳，令教師飽受困擾。
可憐天下父母心，愛護子女係家長嘅天性，投訴亦係家長嘅權利，但凡事要適可而止，過分愛惜及保護子女，唔止對兒童無益，而且令自己變成蠻不講理嘅怪獸家長，何必呢？有人研究指出，怪獸家長經常持雙重標準，當佢哋認為子女受到委屈而向學校及教師投訴時，完全當自己係消費者；但當子女違反校規而受到懲罰時，就以「孩子不懂事」為由反駁，一切以自我為中心，完全冇將學校及教師放喺眼內。
所以話，今時今日教師真係唔易做，一方面要盡自己本分教好學生，另一方面要應付家長沒完沒了嘅投訴，包括無理取鬧嗰種，少啲忍耐力都唔掂。最慘仲係，教育局闊佬懶理，對前線教師處理家長投訴支援不足，導致教師要獨力面對投訴，壓力唔大至奇喇。正如教育團體話齋，教育局雖逐步將處理家長投訴權力下放予學校，但不可推卸責任，除咗要加強家長教育，減少不必要投訴，亦應該為教師提供有關培訓。冇錯嘞，教師成日要面對家長投訴，應接不暇，疲於奔命，點可能專心教學吖？教育質素又點可能提高吖？
講開又講，中國社會一向有尊師重道嘅傳統，學生固然要聽老師教導，家長亦要尊重老師，呢啲係最基本嘅道理。雖然話時移勢易，依家唔興呢支歌啫，但尊重別人等於尊重自己，點都唔能夠無理取鬧。再講喇，溺愛唔等於真愛，如果家長真係想子女健康成長，就唔好將佢哋當成溫室裏面嘅小花，而要畀佢哋接受適當嘅鍛煉及考驗，否則，盞搞到自己成為怪獸，連子女亦成為永遠都養唔大嘅小學雞，咁就弄巧反拙喇！