踏入初夏，有乜嘢節目好得過去泳池行下水禮吖。不過咁，下次去游水之前，可能要打個電話問吓有冇救生員先，事關救生員隨時集體請病假，去到先知道摸門釘就冇癮喇。
唔係功夫茶亂噏o架。尋日係復活節假期最後一日，唔少市民欲趁機暢泳一番，康文署轄下嘅維多利亞公園泳池一早就逼爆唔少泳客。可惜吖，因為救生員集體「生病」，導致維園泳池救生員人手不足，無法開池。泳客慘食閉門羹，乘興而來，敗興而歸，梗係不滿啦，有人仲火滾到同保安員大打出手添，擾攘至下午二時，泳池先得以重開。
救生員之所以齊齊請病假，其實唔係患咗乜嘢傳染病，而係有心病啫。港九拯溺員工會發言人郭紹傑係咁講嘅，維園泳池人手長期不足，每個標準池只得三人當值，唔符合至少四人嘅國際標準，救生員做到死之餘，泳客安全亦欠保障，員工要求康文署增加六名救生員，但署方以需時談判為由拖得就拖，直至上周署方正式拒絕員工訴求，員工迫於無奈只好發起集體請病假行動。但康文署就有另一個講法，話救生員人手係因應每個泳池嘅使用量而定，唔可以一概而論。總之就係雞同鴨講，傾唔埋欄，結果咪搞出事嚟囉。
救生員為自己爭取正當權益，本來無可厚非，而每個公眾泳池需要多少救生員當值先足夠，署方同救生員有乜嘢矛盾，外界好難了解，總之一切以保障公眾安全為要。不管員工幾咁委屈，訴求幾咁正當，如果郁吓就集體請病假，郁吓就擅離職守，畀人嘅印象係以公眾安全為籌碼同當局討價還價，好難得到公眾嘅理解同支持。試諗吓，如果個個都以個人利益為先，公院醫生、救護員、消防員、警察稍有唔滿意就集體請病假唔返工，香港仲成世界嘅。
話時話，冰凍三尺，非一日之寒，自從多年前康文署大幅削減救生員之後，雙方就不斷為人手不足同待遇嘅問題爭拗不休。就講維園泳池吖，去年十月已發生過一次變相罷工，今次係第二次嘞，而其他泳池亦係輪流發生，已經成為常態。署方員工拗餐飽，無辜市民慘成磨心，早就煩不勝煩。
不過講到底，康文署一味見招拆招，敷衍了事，從來無嘗試從根本上解決問題，先至係工潮不斷嘅罪魁禍首。咪話功夫茶唔提醒，泳季就快來臨，救生員人手不足隨時爆大鑊o架。心病還須心藥醫，唔該康文署快啲同救生員四四六六拆掂佢，唔啱講到啱，千祈咪攞泳客安全嚟較飛呀！