香港經常以法治社會自詡，話就話法律面前人人平等，其實純屬掛羊頭賣狗肉，香港嘅法治就好似一條橡筋咁，因人而異，時緊時鬆，有幾種標準o架。
嗱，只要睇吓港府點樣包庇及放生壹淫媒，就知道所謂法治係咩一回事。壹淫媒旗下嘅《蘋果日報》及已壽終正寢嘅《爽報》，喺舊年三月大角咀懷疑弒親命案進入司法程序、死者幼子周凱亮被落案控告謀殺後，居然喺頭版刊登被告羈押期間嘅專訪，完全視法律如無物。律政司拖拉四個月，舊年七月及八月先至入稟高院，分別控告兩報及相關總編輯、記者藐視法庭，但直到今日仲未正式審訊，你話奇唔奇吖！
正如家長聯會會長李偲嫣質疑，《蘋果日報》及《爽報》藐視法庭案發生超過一年，拖到依家仲未開審，究竟有冇搞錯吖？而學者宋立功就話嘞，案件一拖再拖，律政司隨時要用更多人力物力處理，唔止浪費公帑，亦影響外界對香港司法嘅觀感。
話時話，香港司法親疏有別，外界嘅觀感本來就唔好得去邊。咁多年來，壹淫媒旗下刊物違反《淫褻及不雅物品管制條例》個案累積多達一百二十八宗，案底仲厚過電話簿，但次次都獲輕輕放過，大家早就見怪不怪；最離譜嘅係，其中十九單案一拖再拖，竟然獲准一併處理，最後只有部分被判罪成，其餘統統放生，就算罪成嘅個案亦不過罰款幾千至幾萬元咋，如果話當局唔係包庇，細路仔都唔信喇！
呢，咪就係因為得到港英餘孽包庇及護航，壹淫媒有恃無恐，先至會愈來愈猖狂囉。係人都知，藐視法庭屬於嚴重罪行，當局居然一拖再拖，簡直匪夷所思。更搞笑嘅係，律政司仲要另外花費公帑「諮詢」獨立資深大律師嘅意見，先至作出檢控，唔通堂堂政府連資深大狀都冇？或者正如有人質疑，當局係咪畏懼外國勢力而要聘外援呢？有位律政司代表律師日前公開發表所謂「有錢人」嘅偉論，睇嚟淫賤黎可能就係當局眼中嘅「有錢人」啩，如果唔係，點會得到百般呵護吖。
正所謂，唔怕唔識貨，最怕貨比貨。香港法治名不副實，對壹淫媒百擒百縱，而台灣就唔同嘞，人哋依法辦事，絕對唔會姑息。近年壹淫媒將香港搞到烏煙瘴氣不特止，仲將魔爪伸到台灣，喺寶島宣淫販賤，挑戰法紀同道德底線，結果激起民憤，多次受到台北當局嚴懲。淫賤黎喺香港橫行無忌，以為可以喺台灣照辦煮碗，卒之成為過街老鼠，呢啲咪就係自取其辱囉。講到底，台灣有正氣，違法必究，執法必嚴，對淫賤傳媒見一鑊罰一鑊；而香港就充滿邪氣，餘孽同淫媒狼狽為奸，互相包庇，唔怪得愈墮落愈快樂喇！