每個地方都有自己嘅故事，每間店舖都有自己嘅歷史，尤其係嗰啲具有本土特色嘅傳統小店，更加係一座城市嘅歷史見證。可惜嘅係，香港呢類特色小店執吓一間又一間，遲早成為歷史回憶。
呢嗱，又一間小店不敵貴租而被迫結業嘞。一間位於北角嘅牛雜店尋日最後一日營業，吸引大批市民慕名而來，簡直係其門如市，場面墟冚。市民蜂擁而至，唔止為咗一嘗秘製牛雜嘅美味，更加係為咗細味香港嘅歷史，簡單講，佢哋無非想留住集體回憶咋。你知啦，牛雜係香港特色街頭美食，呢間小店開業接近十年，有口皆碑到連「貪湯」湯顯明都以廉署名義豪掃牛雜同魚蛋嚟款客，落閘結業的確令人惋惜。
難得有口碑，點解要結業呢？咪因為租金貴囉。店主慨嘆，高峰期擁有四間分店，本來前景唔錯，可惜最靚嘅牛雜都敵唔過牛氣沖天嘅加租潮，以北角店為例吖，由六年前兩萬幾蚊加到現時接近五萬蚊，賣幾多牛雜都為唔到皮喇。可以毫不誇張咁講，如果租金繼續咁漲，香港人唔止愈來愈難食到地道美食，連搵食都愈來愈艱難呀！
咁講喇，牛雜店人山人海嘅一幕，一方面反映香港人情味濃厚，對特色小店依依不捨，一方面反映高地價、高樓價、高租金嘅「三高政策」遺害深遠，搞到人人都有兔死狐悲嘅感覺。
係人都知，以前香港係創業天堂，市民只要有一技之長，小本經營都有機會飛黃騰達。可惜今日無呢支歌唱咯，業主飛擒大咬，舖租不斷飆升，莫講話特色小店無法經營，中小企甚至大型食肆都難以立足，搞到成個香港好似國際品牌展銷場咁，商場千篇一律，唔係金舖就係手機舖，唔係化妝品連鎖店就係電器連鎖店，毫無特色，難怪香港被視為全球最難創業嘅地方。
話時話，香港競爭力每況愈下，歸根究柢就係受三高政策所累。租金高企，生意難做，問題並非始於今日，受影響嘅亦唔止呢家牛雜店。嗱，香港核心商業區嘅商舖租金已超越紐約，成為世界第一，鬧市商舖呎租動輒上千元，小商戶根本唔可能生存。本報記者曾走訪銅鑼灣、旺角、尖沙咀等黃金地段，發現部分街道店舖十室九空，傳統小店灰飛煙滅。最諷刺嘅係，部分特色食肆雖然獲得米芝蓮推介，依然難逃倒閉厄運，有餐廳東主明言擔心業主加租多過獲得推介嘅喜悅，亦有旅客根據旅遊指引專程前來品嘗地道美食，點知小店已經結業，食咗閉門羹，乘興而來，敗興而返。
都係唐詩講得好，「此情可待成追憶，只是當時已惘然。」功夫茶建議送一碟牛雜畀港產官僚，提醒佢哋唔好再無心無肺，任由租霸橫行，如果唔係，香港人遲早連集體回憶都冇埋。