有朋自遠方來，不亦樂乎。世界最大郵輪之一嘅「瑪麗皇后二號」日前停泊啟德郵輪碼頭，本來係好事，可惜由於碼頭配套天殘地缺，交通工具又唔足夠，結果搞到過千名旅客大排長龍等的士，怨聲載道。一個全新嘅郵輪碼頭都搞成咁，香港仲有乜資格叫「旅遊之都」吖，叫「失禮之都」就差唔多。
話時話，今次已經係「瑪麗皇后二號」第三次訪港嘞，頭兩次因為船身太大，只能停泊喺葵涌貨櫃碼頭，簡直大殺風景。今次喺啟德郵輪碼頭靠岸，本來以為可令旅客對香港改觀喇，點知仲衰多幾錢重，唔少旅客淨係等的士都等咗兩、三粒鐘，問你怕未！
呢，「東方報業民意調查」顯示，對於旅客逼爆的士站，三成八受訪者指摘交通配套嚴重不足；三成三批評香港大都會形象受損；兩成三直斥影響旅遊聲譽。講起都好笑，啟德郵輪碼頭話就話係港府豪花八十億元打造嘅新地標，其實裏面空空如也，冇交通配套，冇餐飲設施，甚至連零售商店都冇。有位澳洲旅客直言，經過今次事件，對香港印象大打折扣，以後都唔會再嚟。你話嘞，香港係咪失禮人吖？
最離譜嘅係，當局知錯不改，仲要死撐。碼頭營辦商話喎，當日已經安排二十幾架穿梭巴士接載旅客，係旅客唔領情，自行坐的士喎。喂，全船有二千幾名旅客，一架旅巴頂多坐幾十人，最少要四百幾架次先可以完全疏導人流，試問旅客有乜辦法唔自行搭的士吖？上述民調又顯示，三成七受訪者批評碼頭營辦商安排不當，令港蒙羞；三成三斥無吸取過往經驗；兩成五指欠缺危機管理。
正所謂，上樑不正下樑歪，碼頭營辦商咁嘅服務態度，其實都係向港產官僚學嘅咋。港府明知有大型郵輪靠港，竟然唔識得及早協調及安排，任由碼頭營辦商自生自滅，唔出事至奇喇。難怪四成四受訪者認為港府應督促營辦商改善問題；三成三直斥港府監管不力，推卸責任；一成九批評放任政策，無履行監管職責。仲有吖，四成九受訪者直斥港府後知後覺，漠視問題；兩成六認為等同趕客。
講開又講，啟德郵輪碼頭啟用未夠一年，醜事已經一大籮，唔係逢雨必漏，就係老鼠為患，唔係設施殘缺，就係服務欠佳，港府仲話要將香港打造成區內首屈一指嘅郵輪母港喎，簡直係阿Q精神。冇錯，香港得地利之便，加上內地因素，本來的確有條件吸引更多郵輪嘅，弊在港產官僚志大才疏，有破壞冇建設。咪話功夫茶唔提醒吖，今年仲有十七艘郵輪抵港，港府再唔改善問題，呢個新地標只會淪為國際笑話嘅咋！