早排風雲變色，黑雨加冰雹夾擊，搞到香港七國咁亂，好似世界末日。大家可能淨係睇到商場變水簾洞，其實當日新界嚴重水浸，幾乎搞出人命。
件事係咁嘅。喺黑雨襲擊之下，新界新田水浸黑點小磡村成為澤國，河水倒灌，唔少村屋畀水浸咗，點知渠務署安裝嘅五個洪水警報器居然冇任何動靜。有位村民義工梁先生擔心鄰居安危，於是主動報警，並且摸黑澗水逐家逐戶拍門通知居民往高地疏散。
據梁先生所講，河道上游有多個分支，喺天橋底匯聚流入深圳河，每年都會出現水浸，輕則水深及膝，嚴重時甚至水浸門楣，附近農田盡成汪洋，偏偏小徑又冇加任何圍欄，萬一不慎跌入河中，後果不堪設想。佢仲話呀，即使佢咁熟悉當地地形，都試過被急流沖開一百米，今次冇人傷亡係咪算好彩呢？
所以話，渠務署簡直靠害。居民旨意警報器提醒，點知關鍵時刻甩拖，簡直豈有此理。嗱，渠務署第二日派員檢查，發現五個警報器中兩個不知所終，其餘三個失靈，署方話係因為電子零件故障喎。問題係，如果渠務署平時勤啲檢查，警報器又點會自廢武功呢？難怪有村民狠批署方草菅人命啦。
最匪夷所思嘅係，渠務署事後接受本報查詢時居然自打嘴巴，話當日河道暢通，警報系統運作正常喎。咁就好笑嘞，如果河道暢通，點會水浸？村民又使乜疏散吖？如果系統正常，點解冇人聽到警報呢？更離譜嘅係，對於村民一直要求河道加設圍欄，署方推搪河堤唔適合作為行人通道，而且將個波推畀村民，提示佢哋使用村內安全通道，唔好進入河道範圍，免生危險喎。唉，鬼唔知阿媽係女人咩，如果當局肯接受建議加設安全圍欄，又點會有人走入河道呀！
講開又講，縮骨卸責唔係渠務署專利，而係港產官僚嘅通病。講番呢場黑雨，唔止全港立立亂，連高鐵工程亦甩甩漏漏，搞到嚴重延誤，估計超支數以百億元計。更好笑嘅係，當局賴天賴地賴人手不足，總之乜都唔關佢哋事，問你服未！
正所謂，三分天災，七分人禍。香港話就話係國際都會，可惜幾乎每次暴雨必成災，唔係水浸隧道就係樹倒山塌，再唔係就交通癱瘓，簡直仲衰過第三世界，呢啲唔係政府嘅責任，又係邊個嘅責任吖？咪話功夫茶唔提醒，雨季又到啦，唔該港產官僚打醒十二分精神，做好防災措施，如果再搞個大頭佛出嚟，你哋自己搵窿捐喇！