公務員畀人叫鐵飯碗，真係好貼切，薪高糧準唔在講，部分人就算蛇王失職東窗事發，一樣得到官官相衞嘅保護傘包庇，飯碗絲毫無損，繼續尸位素餐，印印腳等住退休咬長糧。所以咯喎，每次港府話增加公僕人手，社會嘅即時反應通常唔係慶幸有更多人力服務市民，而係擔心有更多懶蟲浪費公帑。
立法會財委會審議預算案，公務員事務局局長鄧國威透露一四至一五年度公務員職位增加二千五百多個，增幅約一點五個百分點，按年增幅係自○七至○八年度以來最高。咁整體人數即係幾多呢？如果預算案最終順利通過，明年三月底公務員編制將會高達十七萬三千人，其中以屋宇署、房屋署、入境處及海關等部門嘅人手增幅最為顯著。
即係咁，公務員係行政機器嘅螺絲，如果為咗理順運作，改善施政，適量增加人手亦係無可厚非嘅。一來公僕退休潮殺到埋身，雖然話官場懶蟲多啫，但係大批資深公僕引退始終令港府面臨青黃不接危機，如果無新血補充，行政機體只會更加虛弱嘅咋；二來咯喎，大家都知啦，前朝政府胡混度日，留低大堆爛攤子畀今屆政府收拾，好似搞到個人遊旅客逼爆過境口岸、僭建氾濫成災、公屋建屋量大落後咁，淨係執呢啲蘇州屎都有排做，相關部門如海關同屋宇署等淪為重災區，前線壓力與日俱增，家陣酌量擴充人手，應該都唔會有太多人反對嘅。
不過咁，公務員人手就多咗嘞，係咪真係交到貨先？嗱，古人話約法三章，今日港府要求放水開位，市民唔使你哋約法三章，只要求你哋做到兩件事啫。首先，今屆政府一定要有所作為，唔可以學前朝政府渾渾噩噩，得過且過。港產官僚無嘢叻，最叻就係搵藉口偷懶，以前一味話「小政府，大市場」，借頭借路乜都唔做，蹉跎歲月，無所作為，依家公務員編制擴大，政府規模唔小喇，以後再無藉口翹埋雙手唔做嘢嘞啩！
至於第二件事咯喎，就係喺內部嚴打懶蛇。講到公僕蛇王呢家嘢，相信都唔使功夫茶多介紹咯，絕代雙貪其身不正，帶頭黐飲黐食，胡混度日，食環署、消防處、康文署、屋宇署……全部都係超級蛇竇，職員偷雞蛇王嘅醜聞不絕於耳，五花八門，淨係功夫茶都鬧到口乾喇。如果當局唔撥亂反正，呢頭縱容屬下偷懶怠職，嗰頭申請公帑開位，納稅人嘅血汗錢咪使得好冤枉？
一句講晒喇，不怕公僕擴編制，只怕庸官無作為。港府施政口號係福為民開，唔係福為官開，如果公務員開位結果變成三個和尚無水喝，養多一批蛀米大蟲，咁麻煩鄧國威大刀闊斧刪職位，唔使多，一個就夠嘞，就係公務員事務局局長個位吖！