港府計數一味靠估，財政預算案固然年年估錯，連計算基建開支一樣錯到離晒譜，搞到工程嚴重超支，一個二個淪為大白象。咁搞法，就算庫房水浸，都唔夠港府呢個敗家仔浪費啦。
唔係功夫茶亂噏o架。早前立法會否決香港電台新大樓撥款申請，咪就係因為嚴重超支囉，○九年當局估計新大樓造價不過十六億元，點知相隔幾年，竟然大幅飆升逾兩倍至六十億元，唔畀立法會打番轉頭至奇喇。仲有吖，大嶼山小蠔灣廚餘處理廠造價，亦由一○年估計嘅五億元急增至十五億三千萬元，短短四年暴漲兩倍，問你怕未。
話時話，工程超支嘅例子多不勝數，又點止港台新大樓及小蠔灣廚餘處理廠吖。正如「東方報業民意調查」顯示，三成六受訪者批評工程超支成為無底洞；兩成九炮轟基建淪為大白象；兩成六指上述情況只係冰山一角咋。嗱，讀者眼睛係雪亮嘅，本報早前抽查目前尚未完工嘅九項政府重大基建，發現全部超支，最新預算比當初申請撥款時嘅預算高出三成至兩倍不等，合共超支一千一百億元。大家話喇，港府究竟有幾多錢可以浪費吖？
港府洗腳唔抹腳，講到底都係拜前特首曾蔭權爵士所賜。貪曾好大喜功，當年大搞所謂十大基建，可惜志大才疏，佢貪威識食就叻，做實事就完全唔係嗰皮，搞到唔少項目流於紙上談兵，直至政府換屆仲未動工，遷延時日嘅結果，成本梗係暴增啦。呢，四成一受訪者認為前朝連累現屆政府及納稅人加倍埋單；兩成七批評工程嚴重超支令現屆政府大失預算；兩成五直斥前朝遺禍，後人遭殃。
講多無謂，數字最實際。回歸後嘅工程開支，本來一直維持每年約二百億元，點知到咗一一至一二年度，開支飆升至五百二十六億元，今年預料超過七百億元添。前朝議而不決，基建工程拖到近年至一窩蜂上馬，搞到工程界不勝負荷，成本有乜辦法唔急升吖。難怪三成九受訪者批評前朝政府難辭其咎；三成六轟各部門溝通統籌不足；兩成擔心工程質素受影響。
老實講，市民擔心工程質素受影響，唔係無理由o架，好似添馬艦政府總部咁吖，入伙至今揭發多達十六萬三千多項甩漏，簡直係千瘡百孔，匪夷所思。計功夫茶話齋，無論庫房點樣水浸都好，始終係納稅人嘅血汗錢，絕對唔容許港產官僚亂咁揈，既然官老爺成日將審慎理財掛喺嘴邊，咁就唔好大隻講嘞，以後再有工程嚴重超支，唔該你哋自動減薪以謝天下喇！