沒有最醜，只有更醜。高鐵工程爆出嚴重延誤醜聞，搞到超支可能數以百億元計，本來已經駭人聽聞嘅啦，點知港鐵同港府嘅態度更加令人匪夷所思，唔止冇坦白交代一切，反而互相推卸責任，而且遮遮掩掩，企圖用大話冚大話，睇嚟呢單高鐵醜聞黑幕重重，隨時仲黑暗過嗰條地底隧道吖。
嗱，港鐵嘅藉口真係層出不窮。繼早前賴天賴地，將工程延誤歸咎黑雨及地質等環境因素之後，日前又聲稱工人不足，一度想趕工追回進度都唔得喎。呢啲咪叫懶人多藉口囉，賴完天，賴完地，家陣仲賴埋人添，不如索性賴蛇蟲鼠蟻佔領地盤吖，笨！
最好笑嘅係，港鐵居然連大話都唔識講，搞到自相矛盾，漏洞百出。有西九總站嘅地盤工人踢爆，高鐵無錯係追唔上進度，不過唔係因為人手不足，而係因為圖則成日出錯，令工程動彈不得，工人被迫停工。地盤工人仲爆料話，工程進度一直極之緩慢，要如期完工根本係不可能嘅任務，當局早前拍晒心口話工程唔會延期，分明就係不盡不實，存心隱瞞真相。
計功夫茶話齋，當局唔好再搵藉口嘞，無能咪認無能，失職咪認失職囉，官僚出醜都唔係第一次喇。更何況，就算工程受阻真係因為黑雨成災，地質阻路，人手不足，唔通咁就代表你哋無責任咩？一場大雨、一塊石頭就將整個高鐵工程拖垮，香港幾時淪落到呢個地步？當然，高鐵工程嚴重延誤，需要問責嘅唔止港鐵，仲有港府，作為監管者，事前居然一無所知，爆出醜聞之後至話感到「驚訝」喎，港產官僚咁窩囊咁賴皮，市民何止驚訝，直頭憤怒添吖！
正所謂，人比人，氣死人。同一條廣深港高鐵，內地段長一百一十幾公里，造價只需一百六十幾億元人民幣，而且工程快速，早就落成通車，反觀香港段不過二十六公里啫，原本需要近七百億元，已經令人嘩然，依家工程一拖再拖，隨時要成千億元埋單，你話納稅人係咪無辜吖。回歸前，英國人強政高效，千億元玫瑰園計劃話做就做；回歸後，港府跛腳低效，連一個高鐵工程都搞到甩甩漏漏，唔通香港真係冇運行？
見微知著，高鐵工程嚴重延誤，只係香港蹉跎歲月、日漸沉淪嘅縮影咋。大家睇吓，港府就好似高鐵地盤咁，施政一塌糊塗，政客就好似嗰場黑雨，不斷興風作浪，唯恐天下不亂，整個香港不斷喺政治爭拗中內耗空轉，仲點會有運行吖。嗱，立法會又上演拉布鬧劇嘞，今次唔知要浪費幾多時日，浪費幾多公帑咯。
高鐵醜聞如黑箱，香港沉淪路漫長。如果有朝一日香港倒退變番一個小漁村，功夫茶絕對唔覺得驚訝，官僚政客有破壞冇建設，淪為千古罪人，到時唔好又賴地硬吖！