C朗國王的新砵閃爆

【記者Billy馬德里現場直擊】一連兩日嘅NIKE足球系列產品展前晚展開,應屆金球獎得主C朗尋晚壓軸單拖孭飛,場面墟冚,最巴閉係呢位皇馬球星獲「國王式」款待,喺馬德里王宮Sell新戰靴Mercurial Superfly;另一位皇馬核心莫迪歷亦夠晒威水,首日亮相惹嚟各地傳媒大包圍,佢仲即席潮玩Panini(畀你貼),算你冇失禮啦!

C朗係當今球壇「冧吧溫」,出新砵咁大件事,運動品牌NIKE當然要搞大佢啦,尋晚就安排呢位葡國Icon喺馬德里Salon de Reinos做騷,呢度喺1630年建成,係當時西班牙王宮,C朗舉行新波砵發布會個場地更加係以前西班牙國王舉行盛宴嘅地方,即係當正C朗係國王咁款喎!主辦單位播廣告介紹佢對全新戰靴Nike Mercurial Superfly,C朗其後強勢登場示範球技,佢前後現身約10分鐘,期間大讚對鞋超好著,夠輕又貼腳,做到「人砵合一」。當傳媒講到葡萄牙國家隊冇乜人幫到佢手,C朗強調唔覺自己係單天保至尊,仲話世界盃同歐聯一樣咁重要,希望葡萄牙同皇馬都有好成績。

莫迪歷潮玩「畀你貼」

C朗排場勁,佢個皇馬隊友莫迪歷亦唔失禮,呢位克羅地亞國腳早一日出席NIKE產品展,同日出場嘅比比、阿歷士張伯倫同華拉尼根本唔夠莫迪歷鍊,莫迪歷被安排喺會場最大面積嘅場地接見記者,點解?因為佢受歡迎囉!莫迪歷外表係「毒毒哋」,但勝在平易近人,冇乜架子,難怪巴西、意大利甚至墨西哥等各國媒體爭住搵佢訪問,令現場秩序一度混亂,本報記者等足成粒鐘先至捉到佢傾偈,問到佢最想捧西甲、歐聯定世界盃,佢話希望全部捧晒!

莫迪歷係就係冇C朗咁型,但講潮佢未必輸晒,有位巴西記者帶咗本近期重新興番嘅「畀你貼」集圖冊,莫迪歷二話不說就搶嚟玩,仲破格到將全部克羅地亞球員嘅貼紙掉轉嚟黐,佢解釋話呢個係家鄉傳統,「掉轉」可以保佑國家隊喺世盃有運行喎!