屢戰屢敗，屢敗屢戰，簡稱「三堆一爐」嘅擴建堆填區及興建焚化爐計劃連番闖關失敗之後，稍後會再度提上立法會申請撥款，你估今次可唔可以成功闖關呢？睇怕都係未可樂觀咯。
功夫茶唔係亂估。有環保團體就三堆一爐計劃進行民調，雖然逾半受訪者支持計劃，但絕大部分人對計劃認知不足，僅約兩成一人知道堆填區最快喺一五年飽和，不足百分之七知道興建一座焚化爐需時七至九年，同時知道兩個答案嘅人更低至百分之二添。大家話嘞，三堆一爐關乎全港利益，市民對計劃不甚了了，點可能支持呢？計劃又點可能通過呢？
所以話，三堆一爐落得寸步難行嘅境地，完全係當局一手造成。宣傳開道，輿論先行，推動任何政策，首先要做好宣傳教育，呢啲係基本常識，環保官僚連咁都懶得做，你話佢哋幾求其吖。即係咁，港府打擊垃圾蟲都要大事宣傳喇，家陣講緊擴建堆填區及興建焚化爐咁具爭議性嘅話題，遇到咁大阻力，居然唔識得做好宣傳，爭取民意，一味以為喺立法會箍夠票就算，咁樣推銷政策，唔撞板至奇喇。
計功夫茶話齋，三堆一爐應該改名叫「三衰一爐」至啱。第一衰就係宣傳不足，市民認知偏低；第二衰就係當局無真正解決環境衞生問題，搞到垃圾遍地；至於第三衰咯喎，就係源頭減廢唔湯唔水，似有若無。三衰共冶一爐，唔怪得三堆一爐阻力重重，衰完又衰，敗完又敗喇！
再講喇，喺石鼓洲興建焚化爐係咪唔會影響環境，當局至今未能攞出有力證據，釋除公眾疑慮，試問市民尤其係首當其衝嘅長洲居民又點可能支持呢？
正所謂，一節見則百節知，從當局推動三堆一爐懶散失職，就知環保工作點解毫無改善。立法會日前討論洋垃圾問題，揭發本港回收率下跌，當局居然連統計資料搞錯咁離譜嘅藉口都講得出，簡直匪夷所思。功夫茶想提醒環保官僚，前朝政府之所以劣迹斑斑，臭名遠揚，其中一個原因就係環保工作敷衍塞責，一事無成，如果你哋唔想步前朝後塵，淪為官場垃圾，咁就要做好本分，千祈唔好令「垃圾圍城」噩夢成真，搞到香港變成臭港吖！
知恥近乎勇，環保官僚好心洗心革面，認認真真做好自己份工喇。不如咁吖，從今日起加強宣傳，以三衰一爐為口號，以示自己知衰，痛定思痛，咁或者可以贏回市民支持嘅。