唔經唔覺，「盛事基金」已經成立咗五年，獲政府注資二億五千萬元，大家知唔知呢個基金做乜嘅呢？嗱，唔知係正常，呢個基金雖然劣評如潮，但係長期無王管，就算黑箱作業藏污納垢，外人都好難察覺嘅。等功夫茶講畀大家知喇，盛事基金嘅最大功能，就係弄虛作假，濫用公帑！
功夫茶唔係亂噏，審計署最新報告踢爆，盛事基金千瘡百孔，已經淪為利益團體嘅私人提款機。好似前年撥款一千五百萬元資助一場高爾夫球賽事，二萬三千張門票，居然超過九成都係派番畀自己友，咁都算推廣香港、吸引遊客？又好似舊年資助八百萬元舉辦嘅傑志對曼聯足球賽，四萬張門票，只有不足一半公開發售，唔使問阿貴，又係益晒自己友喇。至於嗰場賽事爆出「爛球場」大醜聞，推廣香港變成影衰香港，呢個已經係後話。
正所謂，沒有最醜，只有更醜。當局聲稱盛事基金至今共資助咗廿四項活動，其中十六項已經創造咗一萬個職位，吸引超過九十萬名參與者喎。其實純屬吹水嘅咋，審計報告踢爆官僚講大話，所謂嘅一萬個職位，大部分只係一至幾日嘅臨時職位，其中數百個仲係分文不收嘅學童添，官僚講大話唔眨眼，問你服未。
即係咁，盛事基金淪為篤數基金，舉辦嘅活動既冇新意，冇創意，又不斷重複，仲誇大對旅客嘅吸引力同創造就業機會。審計報告批評，基金評審委員會管理混亂，多數款項竟然不追討，甚至有團體懷疑亂用資助，涉及不當行為，簡直係亂象叢生，烏煙瘴氣。
最好笑嘅係，盛事基金管理層仲死撐，話經過詳細討論至批出撥款喎。嗱，基金撥款被人濫用，唔係你哋嘅錯，唔通係納稅人錯咩！
所以話啫，港府真係阿茂整餅冇嗰樣整嗰樣，唔衰攞嚟衰，明知班官僚得過且過，搞個盛事基金出嚟又不監不管，結果咪變成私人提款機，畀人多個平台私相授受，上下其手囉。「盛事」變「醜事」，基金變搵笨，香港畀旅客嘅印象唔係乜嘢「盛事之都」，而係「醜事之都」就真。
話時話，港府施政顛三倒四，有時真係唔到你唔服，一方面成日喊窮，講起扶貧就牙痛咁聲，另一方面就濫用公帑，億億聲公帑倒落海都面不改容。呢，高鐵工程嚴重延誤，造價隨時飆升至過千億，你話納稅人係咪冤枉吖。
審計署報告促請當局制訂機制，監察盛事基金，嘥氣啦。港府搞盛事基金，都係為咗提升香港形象，吸引遊客啫，家陣香港有人嫌遊客太多，搞到又要「驅蝗」，又要「拖篋」，仲使乜推介吖。盛事基金已無用武之地，與其繼續浪費公帑，不如索性摺埋佢，將啲錢用嚟扶貧仲實際喇！