政情：伍穎梅莊偉茵醫管局助陣
政府尋日宣布醫管局董事局「換血」，加入三名新成員，包括九巴董事伍穎梅（Winnie）、國泰航空企業事務董事莊偉茵及前立法會秘書長馮載祥（Ricky），下月起生效，任期兩年。雖然睇唔出三人同公立醫院管治有何關係，但可以肯定嘅係三人公關手腕了得，將來萬一發生醫療事故，搵佢哋拆彈可謂得心應手。
Ricky做咗立法會秘書長十四年，同各黨派嘅立法會議員交手，公關手腕可謂爐火純青。國泰大公關莊偉茵公關經驗一樣豐富，啱啱上月先至解決一單棘手投訴，就係立法會議員詹培忠喺加拿大溫哥華機場搵唔到機位返香港，莊偉茵事後喺電話解畫解釋事件，等詹Sir順番條氣。至於Winnie就擁有豐富嘅企業及行政管理經驗，而且仲係醫管局主席胡定旭領導嘅智經研究中心理事，深受肥胡賞識。
政府尋日亦委任咗社會福利諮詢委員會六個新成員，包括協成行集團董事總經理方文雄、律師陳美蘭、葉恩明醫生、聖公會福利協會副總幹事文孔義、香港真光中學校長杜子瑩及會計師楊傳亮，下月起生效，任期兩年。